الدليل الشامل للعمرة و زيارة الأراضى المقدسة من المملكة المتحدة 

منقول 

نشر : محمد حسن  

سلام عليكم يا شباب , يارب تكونو بخير

بعد رحلة جميلة و ممتعة في الأراضي المقدسة , هحاول الخص ليكم كل حاجة مطلوبة عشان أداء فريضة العمرة

- بالنسبة للتاشيرات , فيه بصورة عامة 3 انواع من التاشيرات ,  النوع الاول هي التاشيرة للي معاه جنسية بريطانية اللي بتطلع من هنا  : 

https://visa.visitsaudi.com/

و النوع التاني اللي بيطلع للي معاه باسبور مصري و اقامة في بريطانيا (ILR or BRP), و اللي بتطلع من الموقع ده 

visa.mofa.gov.sa/

- لو عايز تجيب حد من اقاربك من مصر  , فهما لازم يشوفو موضوع التاشيرة يتم ازاي , لو حد منهم معاه تاشيرة او اقامة في اوروبا او امريكا (جرين) فممكن ياخد تاشيرة عند الوصول هو و مراته و اولاده , لو محدش معاه تاشيرة , بس ليك اي قرايب في السعودية , فممكن القريب ده يعملهم في مصر دعوة , و تمنها تقريبا 400 ريال ( هو اللي بيدفعها من عنده ) , وكلا النوعين من التاشيرات مش مطلوب ليه باركود  ,ولو انت هتجيب مثلا والدك او والدتك من مصر , فانت لازم تسافر مصرو تسافر معاهم, و يكون معاك شهادة ميلادك عشان تثبت ان اسم الام مطابق لاسم والدتك و يقتنعوا بده

- الاسهل انك تخطط تروح المدينة الاول بعدها مكة , عشان تسافر بسهولة من غير احرام , وتحرم من المدينة براحتك  ,لو وقتك ضيق و مش ناوي تروح المدينة يبقي لازم تحرم قبل ما تركب الطيارة و توصل جدة

- بالنسبة للنت مهم جدا تشتري خط هناك بباقة , النت لا غني عنه هناك , خاصة لو هتستخدم تطبيقات للتكاسي , متعملش تجوال هناك من خطك البريطاني لانه هيكون غالي جدا , مش زي بلاد اوروبا , ب 70 ريال هتجيب خط بباقة كبيرة تكفيك

- لو انت وصلت في الصالة الشمالية , فمتحجزش قطار , لان القطار من المطار التاني وهو بعيد , فالافضل اول ما تخرج انك تشوف اي عربية مكروباص , و هتلاقي كتير ناس بتنادي المدينة , والاجرة 100 ريال يعني تقريبا 22 باوند , والطريق بالمكروباص تقريبا 3 ساعات 

- قبل ما تسافر احجز من booking  الفنادق في مكة و المدينة , لو عايز حاجة فخمة هتلاقي حاجات قريبة غالية , ولو عايز توفر هتلاقي حاجات ابعد ارخص

- بالنسبة للفنادق البعيدة هي مش مشكلة , لان هناك فيه تكاسي كتير و باسعار معقولة , يعني لو فندق علي بعد 6 كيلو من الحرم مثلا ممكن تدفع 10 او 15 ريال في المشوار , فممكن تلاقي نفسك وفرت كتير عن لو اخدت فندق قريب , وممكن تعمل جدول يومي , انك تروح تصلي الفجر و ترجع تنام , بعدها تروح الضهر و تقعد هناك للعشاء , الكلام ده في مكة او المدينة , انا و اسرتي ( كنا 4 افراد ) حجزت 3 ليالي في المدينة ب 600 ريال , و10 ليالي في مكة ب 700 ريال , الاسعار ديه ارخص ما يكون لان الدنيا هناك مولعة , بالمقابل الفنادق كانت بعيدة بس موضوع التكاسي حل المشكلة , وتكلفة التكاسي مع اسعار الفنادق كانت ارخص كتير من لو كنا حجزنا قريب من الحرم 

- استخدام التكاسي هناك ممكن يكون بتطبيق  bolt  او careem  او jeeny   , تطبيق bolt  افضلهم و سعره معقول 

- لو عايز تعمل مزارات في المدينة , فيه اتوبيس بيعدي علي كل المزارات ب 80 ريال , الاتوبيس بيعدي علي تقريبا 10 مزارات مختلفة , وممكن تنزل في اي مكان , وتاخد الاتوبيس اللي بعده , لو انت معاك اسرتك هتكون التكلفة عالية , وقتها الافضل خد تكاسي للمزارات المهمة , اهمهم جبل احد و مسجد قباء , هتلاقي نفسك دفعت ربع اللي كنت هتدفعه في 5 تذاكر في 80

- لو خلصت في المدينة ابدأ جهز نفسك تروح مكة , ممكن تاخد تاكسي لو انتو مجموعة , التاكسي هيكون في حدود 500 ريال  , لو انت لوحدك شوف اتوبيس saptco , نزل التطبيق بتاعهم و احجز من المدينة لمكة , التذكرة ب 69 ريال , وهتلاقي الموقف بتاعهم هنا  بالضبط عند فندق سجي المدينة , 5 دقايق مشي من الحرم النبوي https://goo.gl/maps/ojRAyzxPdmVNjyAr8

- لما تيجي تحجز اتوبيس saptco , هتلاقي فيه موقفين موجودين في المدينة , واحد من فندق سجي المدينة , و ده اتوبيس ب 100 ريال , والتاني موقف اسمه : المدينة طريق تبوك ,  ب 69 ريال , لو عايز تختار الارخص (طريق تبوك) وروح يومها قبل معاد الاتوبيس بساعة مثلا , روح علي الموقف في فندق سجي المدينة  , و قولهم انا عندي اتوبيس من المحطة البعيدة و هما هينقلوك مجانا للمحطة البعيدة

- لما تسافر مكة , مش لازم تكون لابس الاحرام , بس خليه في ايدك, لان الاتوبيس هيقف في مدينة ابيار علي , و اللي هيقف هناك نص ساعة للي عايز يحرم , وقتها روح الحمامات , خد دش , البس الاحرام , صلي ركعتين في المسجد , و انوي الاحرام و خليك جاهز  ,لو انت هتركب القطار من المدينة لمكة , فلازم تحرم قبل ما تركبه , لو هتركب تاكسي او عربية اجرة , فلازم تعرف منه هل هيقف في ابيار علي ولا لا  , لو مش هيقف فلازم تحرم قبل ما تركب 

- اول ما توصل مكة , افضل حاجة انك تروح الفندق الاول تسيب شنطك هناك , لو فيه صحة تعمل العمرة يومها , ساعتها ارجع الحرم و اعمل العمرة هناك , لو انت او حد من اسرتك مهدود و تعبان من السفر , فمفيش اي مشكلة تأجيل العمرة تاني يوم , بس اياك تعمل اي حاجة تتعارض مع الاحرام , زي الشعر او الضوافر و غيره , يعني لازم حتي تنام بهدوم الاحرام كاملة

- العمرة كلها 3 خطوات بس ( ديه أركانها ) , الطواف 7 مرات , السعي 7 مرات , التحلل , يعني تقصير الشعر , لو انت لوحدك ممكن العمرة تاخد ساعة و نص , لو معاك ناس كبيرة او اطفال يبقي تقريبا 3 ساعات

- الحرم المكي عاملين فيه اصلاحات و اعمال إنشائية كتير , فللأسف مانعين اي حد يدخل صحن الكعبة الا لو كان محرم , ده معناه ان اي ست تقدر تدخل , لكن الرجال اللي لابسين البشكير فقط , فيه بابين ممكن الواحد يدخل منهم لصحن الكعبة , باب فهد قدام برج الساعة  , وباب السلام ناحية جبل الصفا , باقي الابواب مش هتدخلك صحن الكعبة ابدا

- تجنب الطواف بالنهار , لان الشمس حامية جدا و ممكن حد فيكم يتعب , ان كان ولا بد, يكون معاك شمسية , الحر هناك غير طبيعي

- هتلاقي ستات بيخبطو فيك بإهمال شديد , وهتلاقي رجالة بتجري و مش شايفينك , ده شئ طبيعي للاسف , فإياك تتعصب او تتضايق

- الطواف و السعي علي الرخام ممكن يوجع رجليك , مش عشان الرخام سخن ( هو دايما بارد حتي بالنهار) لكن عشان ناشف جدا , فممكن تلبس شبشب او جزمة طالما نضيف , محدش هيقول حاجة , الشبشب طبعا للراجل المحرم , والجزمة للست , اياك تلبس جزمة و انت محرم ولا هتبوظ احرامك , الطواف و السعي و انت لابس في رجلك هتلاقيها مريحة جدا

- لو معاك حد في اسرتك مش هيقدر يطوف و يسعي , فإما انك تشوف حد من عمال العربية المتحركة , سعرهم هو 200 ريال للطواف و زيهم للسعي , بديل تاني انك تشتري من عندك عجلة بتاعت كبار السن , ممكن تلاقيها مستعملة ب 50 باوند , وهتسافر عادي في الطيارة ,وقتها هتكون مفيدة للطواف والسعي , بس في الطواف لازم تطلع الدور التاني , ممنوع دخول عربات كبار السن في صحن الكعبة لاي سبب و في اي وقت

- خد بالك كمان ممنوع دخول عربات الاطفال  في صحن الكعبة لاي سبب و في اي وقت , فلو معاك اطفال , فانت يا اما تروح من غير عربية الاطفال و تطوفو من صحن الكعبة لو اطفالك هيستحملوا المشي , او الاب يقعد مع الاطفال  علي ما الام تطوف والعكس , او لو مصر علي عربية الاطفال فهيكون الحل تطوف من الدور التاني اللي المسافة فيه تقريبا 3 اضعاف الطواف في صحن الكعبة

- التحلل من الإحرام بيكون للرجال تقصير او حلق الشعر زيرو , فيه شباب بيعملو ده بالفلوس من باب المروة , او فيه محلات ابعد شوية , بالنسبة للستات هو قص جزء من الشعر , وطبعا ميعملوش ده ابدا قدام الناس , الحمامات قريبة جدا من باب المروة , وممكن الستات تقص فيها كما تشاء

- لو عايز تاخد دش بعد التحلل , ففيه حمامات قريبة من باب المروة , لكن ادارة المسجد شالت الدشات اللي كانت فيها و مكتوب ممنوع الاستحمام , فيه ناس بتضطر  تستحم من خرطوم الحمام العادي , او تستني لما تروح الفندق

- لو عايز تعمل عمرة تانية , فاسهل حاجة انك تاخد تاكسي لمسجد السيدة عائشة ( عن طريق bolt ) , السعر تقريبا 20 ريال , او من الحرم فيه عربيات بتنادي الواحد ب 5 , و فيه اتوبيس مجاني بس محتاج شوية مشي

- من المسجد هناك , فيه حمامات و دشات , اعمل نفس الخطوات اللي عملتها في ابيار علي , و لما تحرم اركب الاتوبيس او تاكسي و ارجع الحرم و كمل نفس الخطوات

- لو عايز تشتري حاجات , ففي برج الصفوة …