ازاي تسافر انجلترا

 كتب أيمن زيادة 

نشر محمد حسن 

تنبيه يجي عليك مراجعة كافة المعلومات الواردة أعلاه طبقا لأحدث القوانين و الشروط الوارده فى المقال و المقال المنشور مكتوب طبقا لتجربة أو رأى شخصى لا يلزم أحدا و لا يلزم صاحب  المدونة بضم الياء  

أولا الطيران

1- اختيار الرحلة المناسبة

كل ماتحجز بدري كل ما يكون احسن

استخدم مواقع الحجز الاونلاين زي skyscanner او wego عشان تشوف الخيارات المتاحة و الانسب ليك .. حتدخل معاد الذهاب و العودة و حيطلعلك كل الرحلات المتاحة و مواعيدها و سعرها و ترانزيتها و كل حاجة

و انت بتقارن بين اسعار الرحلات خلي بالك الرحلة حتنزل انهي مطار .. لان مثلا لو حتنزل في مطار زي جاتويك .. ده محتاج قطر ب 20 استرليني عشان يوصلك لندن .. يعني كانك حتزود على سعر الرحلة 20 استرليني عشان تشوف التكلفة الحقيقية .. بينما مطار زي هيثرو ممكن تروح بالمترو لوسط لندن ب 1ونص استرليني

احيانا بعض الاسعار مش بتكون نهائية لانك لازم بعد الحجز تختار المقعد اللى جوا الطيارة و حجز المقعد له تكلفة اضافية على تمن الرحلة اللى ظاهر قدامك في السيرش

خلي بالك من وقت الترانزيت .. ممكن يكون طويل جدا و حتحتاج تنام ليلة ف اوتيل مثلا في منطقة الترانزيت .. و ده معناه تكلفة حجز ليلة ف اوتيل زيادة .. و ممكن يكون قصير جدا لدرجة تخاف فيها انك تلحق تخلص اجراءات الدخول و الخروج من المطار

المواسم اللى اسعارها غالية في فترة الصيف من ابريل لسبتمبر و فترة الكريسماس .. حاول تتجنب الفترة دي لو امكن

لو انت على خطوط طيران غير مصر للطيران او التركية او الاردنية اتاكد ان اللحوم ف وجبة الطيارة حلال

2- حجز الرحلة

دخل بياناتك بدقة .. بتضيف اي اوبشنز زيادة انت محتاجها و بتختار مكان المقعد و بتدفع اونلاين بالفيزا عادي .. و حيجيلك تاكيد الحجز على الميل

قبل الرحلة ب48 ساعة المفروض تخش على الموقع و تعمل حاجة اسمها تشيك ان .. ده زي تاكيد انك مسافر و بتملى شوية بيانات و اقرارات و بعدين بيبعتلك حاجة مهمة جدا اسمها البوردنج باص .. دي اطبعها و خليها معاك .. او ممكن تطبعها مباشرة ف المطار قبل السفر .. حتحتاجها في الاجراءات ف المطار

3- تجيب ايه و ما تجيبش ايه

ما تنساش تجيب معاك الحاجات دي

1 (شمسية) .. مهما كان الجو حلو و مشمس .. المطر ده شغال طول السنة و حيغرقك .. لو تقدر تجيب معطف مطر كمان يكون افضل

2 (مشترك كهربا ب 3 مقابس) لان الفيش هناك ثلاثية كلها ..

3 (فرش باظ او شطافة السفر) عشان الحمامات هناك مفهاش شطافة

4 (أدوية) هات حاجات للطوارئ لان الادوية هنا غالية شوية و بعضها صعب تصرفه من غير روشتة ..هات مضاد حيوي - مسكن - حاجة للامساك و الاسهال و البرد الخ ... لو بتاخد اي ادوية بانتظام هاتها و يا ريت تجيب الروشتة عشان لو سالوك ف المطار عليها

غير كده الحاجات اللى انصحك تجيبها معاك

5 (الهدوم) ما تجيبش معاك لبس كتير .. الحاجات دي رخيصة هنا.. بس هات كام قميص فورمال عشان الشغل .. مفيش داعي للسكراب او البالطو خالص

ده مثال لقائمة مرجعية ممكن تدي بصة عليها لو في حاجة ناقصاك

https://www.egyptair.com/ar/fly/baggage/Pages/packing-checklist.aspx

ما تجيبش معاك اي حاجة في علبة مضغوطة زي السبراي .. سواء مبيد او فوم حلاقة او برفان

الحاجات دي ممنوع تدخل الطيارة عشان فرق الضغط ف الجو ممكن يخليها تنفجر

ما ينفعش شنطة ايدك اللى حتخش بيها الطيارة يبقي فيها اي ادوات حادة سكين قصافة مقص الخ

خلي بالك من وزن الشنط عشان ما يدفعكش عليها زيادة ف المطار.. على ما افتكر مصر للطيران بتديك شنطين كل واحدة 46 كجم و هاند باج 8 كجم

ما تحطش اوراق مهمة او اجهزة مهمة او فلوس كتير في الشنطة اللى حتدخل الطيارة .. الحاجات دي خليها في شنطة ايدك اامن

خلي معاك في شنطة ايدك اي ورق مهم يخص مكان الاقامة عشان ممكن ضابط المطار يسالك عنه

مش مسموحلك بسوايل اكتر من 100 مل معاك ف شنطة ايدك ..(القانون دا تغير حديثا ..راجع القوانين الحديثة )

ما تاخدش معاك كاش مصري اكتر من 5000 و لا كاش انجليزي اكتر مما يعادل 10000 دولار عشان ما حدش يغلس عليك ف المطار

https://www.cairo-airport.com/en-us/Services/Passenger-Guide/Customs-Regulations

ما تجيبش معاك لحوم او منتجان البان او سجاير او خمور عشان حيقرفوك بسببها في مطار هيثرو

4- في المطار

اعرف كويس انت في انهي صالة مغادرة (ترمينال) لان المسافات بينهم بعيدة جدا و لو رحت صالة غلط ممكن تفوتك طيارتك

الافضل تكون ف المطار قبل معاد رحلتك ب 3 ساعات

المطارات فيها واي فاي مجاني ممكن تستخدمه عادي

المحلات و المطاعم و الكافيهات ف مطار هيثرو هي اه اغلى شوية من جوا لندن بس الاسعار معقولة جدا

هيثرو مطار ضخم جدا .. البوابات بعيدة جدا .. اعمل حسابك عشان معاد الطيارة انك تتوجه لبوابة الخروج بتاعت الطيارة بدري لانك حتمشي مسافات طويلة ممكن توصل احيانا لنص ساعة مشي

مطار هيثرو فيه اماكن للصلاة اسمها Multi Faith Prayer Rooms

لو الطيارة بتاعتك اتاخرت اكتر من 3 ساعات سواء ف المغادرة او الوصول من حقك تطالب بتعويض و حتاخد مبلغ محترم جدا

اول ما تركب الطيارة ظبط التوقيت بتاع ساعة ايدك و ساعة الموبايل عشان ما تتخلبطش في اي مواعيد مهمة او مواعيد صلاة .. مفيش اذان هنا .. حتعتمد على اي ابلكشن موبايل عشان يعرفك مواعيد الصلاة فحاول تظبطه من دلوقتي لو مش عندك

ثانيا الاقامة

لو انت مش حاجز سكن المستشفى او مش حتقيم عند صديق او قريب ليك فالاوبشن المتاح هو حجز اوضة في اوتيل

ممكن تحجز الاوتيل بتاعك من ابلكشنز حجز الاوتيلات زي Airbnb او skyscanner او المواقع دي

www.Trivago.com

https://www.booking.com/index.ar.html

تطبيق حجز الفنادق

https://www.couchsurfing.com/

: تطبيق لايجاد اماكن نوم مجانية كضيف عند مضيف من اهل البلد و هذا التطبيق عملي جدا اذا كنت مسافر لاوروبا

www.hostelworld.com

تطبيق لحجز سرير في هوستيل ضمن غرفة مشتركة

طبعا العروض الارخص بتكون ف الفترة من سبتمبر لحد ابريل .. باستثناء فترة الكريمساس

حسب امكانياتك المادية ممكن تحجز في هوستل غرقة مشتركة او غرفة اوتيل عادي .. من اول 3 نجوم الاوتيل يعتبر ممتاز جدا مش زي هنا .. و حاول تختار مكان الاوتيل قريب من المستشفى او من محطات المترو لو انت ف لندن ..

ثالثا المواصلات

ممكن تعتمد على خرايط جوجل او ابليكشن زي ال city mapper عشان تعرف ايه الاوبشنز المتاحة ليك في التحركات و كمان تعرف الفترة الزمنية لكل اوبشن و تكلفته المالية و في خيارات كمان لتفضيلاتك لو بتفضل مثلا استخدام المترو او بتفضل ما تمشيش على رجلك كتير الخ .. و في كمان مواقع تانية لنفس الغرض زي

https://tfl.gov.uk/plan-a-journey/

ده جميل جدا بس خاص بلندن فقط

لو انت حتسافر دايركت من المطار للمدينة اللى رايحها .. حاول تكون حاجز من قبل ما تيجي اونلاين تذكرة القطر او الاوتوبيس

في شركات نقل بتحرك اوتوبيسات من مطار هيثرو لمعظم الوجهات في انجلترا .. مفيش قطر في هيثرو .. بس ممكن تاخد المترو من مطار هيثرو لحد محطة القطر اللى جوا لندن اللى حتركب منها قطرك للمدينة اللى انت رايحها

ده موقع حجز القطارات

https://www.nationalrail.co.uk/

ده موقع اشهر واحدة من شركات الاوتوبيسات

https://www.nationalexpress.com/

دي باقي لستة الشركات

https://tfl.gov.uk/modes/coaches/coach-companies

بخصوص المترو في لندن ما اسموش ساب واي و لا تيوب و لا مترو .. اسمه اندرجراوند

هو عبارة عن عدة خطوط ماسكين لندن كلها و مقسم لندن لمناطق ..المنطقة المركزية رقم 1 و كل ما بتبعد عن الاطراف المنطقة تاخد رقم ابعد لحد منطقة 9

خلي معاك خريطة المترو على الموبايل عشان مفيش شبكة جوا .. صعبه تعرف من الجي بي اس انت فين او رايح فين .. حتضطر ساعتها تعتمد على اليفط الموجودة او الخريطة اللى معاك ع الموبايل او تسال حد

https://files.londonandpartners.com/-/media/files/london/visit/maps-and-guides/tube-maps/tube_map_december_2017.pdf?la=en

خلي بالك و انت رايح تركب من اتجاه المترو في الخط و برضه الفرع بتاعه لان احيانا في خط ممكن يبقي له فرعين داخليين .. ما تقلقش كل حاجة واضحة على اللوحات .. بس المهم تبص عليها عشان تعرف انت رايح فين

يوم الاحد بالليل في خطوط بتبقي مش شغالة .. خلي معاك برضه خريطة المترو الليلي عشان تعرف تتعامل في اي وقت

عشان تستخدم المترو في اوبشنز كتير .. في اوبشن التذكرة العادية زي مترو القاهرة .. او تستخدم نوع معين من الفيزا عندهم بيخصم تمن الرحلة من رصيد الفيزا .. او عن طريق كارت ذكي ممغنط اسمه أويستر.. و ينفع تستخدمه ف المترو او الاوتوبيس او القطر

ممكن تطلع كارت اويستر عادي من مكنة في المحطات الرئيسية و تشحنه بمبلغ معين و طول ما انت بتركب المترو بتحط كارت الاويستر على دايرة صفرا عند بوابة الخروج و الدخول عشان تفتح و هو يحسب تكلفة الرحلة و يخصمها من الشحن

اول ما تنزل من المطار اعمل كارت اويستر على طول من اقرب مكنة و اشحنه ب 50 استرليني مثلا حيكفوك تحركات اسبوع ف المتوسط

ما تقلقش لو شحنت بمبلغ كبير و اتبقي رصيد ف الكارت لان و انت راجع بلدك ممكن ترجع الكارت للمكنة و تاخد باقي الفلوس اللى فيه كاش عادي

لو شحنت بمبلغ قليل و احتجت تشحن تاني .. سهل من نفس المكنة اللى بتطلع الكارت باستخدام الفيزا برضه

لو الكارت رصيده خلص مسموحلك برحلة واحدة للطوارئ حتتحسب برصيد بالسالب و يتخصم منك اول ما تشحن الكارت تاني من اقرب مكنة

كارت الاويستر فيه منه نوعين.. اويستر الزائر و اويستر العادي.. اويستر الزائر ممكن تشتريه اونلاين و يجيلك ع البيت قبل ما تسافر و بيبقي عليه عروض و تخفيضات في بعض المحلات و لكن الكارت الاويستر العادي في رايي ارخص من حيث التكلفة و ده اللى بنصح بيه .. لو حتقعد ف لندن اكتر من 7 ايام في حاجة اسمها ترافل كارد و ده اوبشن بيتضاف على الاويستر العادي و هو بيديك ميزة عدد لا نهائي من الرحلات لكل يوم ف المترو عشان تتحرك براحتك .. بس هو غالي فما انصحش بيه الا لو حتقعد اكتر من 7 ايام و حتستخدم المترو اكتر من 3 مرات يوميا على الاقل .. ساعتها بس حيبقي موفر

حاول ف المترو تتجنب وقت الذروة عشان الزحمة و الحر و التكلفة و ده من 6ص ل 9ص و من4م ل 7م

خلي بالك في السلالم المتحركة .. اللى مستعجل و عايز يمشي مع السلالم بيبقي على ناحية الشمال و اللى عايز يقف و السلم يوصله بيبقي على ناحية اللمين .. فارجوك ما تقفش ناحية الشمال حتعطل السكة و الناس حتزقك.

من نظام المترو برضه .. لما يقف ف المحطة .. الناس اللى جوا تخرج الاول و بعدين اللى عايز يركب يركب

خلي بالك المترو بيشغل متاخر يوم الاحد الصبح .. ده ممكن يعملك مشكلة لو انت مسافر الاحد الصبح و وراك معاد طيارة .. الافضل ما تعتمدش علي المترو في وقت زي ده

معظم المدن التنقل الداخلي فيها بيكون عن طريق شركات نقل خاصة بتحرك اوتوبيسات .. اشهرها طبعا الاوتوبيس الاحمر بتاع لندن المشهور ابو دورين.. بس عيبه انه هو ابطا شوية من المترو .. فهو لطيف و بيغطي اماكن مش بيوصلها المترو

خلي معاك الخريطة برضه

https://tfl.gov.uk/cdn/static/cms/documents/bus-route-maps/key-bus-routes-in-central-london.pdf

حاليا بسبب ظروف الكورونا خلوا ركوب الاوتوبيسات في لندن مجاني .. اظن ده مؤقت و حيرجع تاني بفلوس لما الدنيا تفتح

بتستخدم ف الاوتوبيس نفس الاويستر كارد عادي .. بس بتلمس المكان بتاعه عند الركوب بس .. عند الخروج من الاوتوبيس لا

الاوتوبيسات طريقة التعامل معاها زي المترو بالظبط .. بس خلي بالك من نقطة .. مش كل المحطات الاوتوبيس بيقف فيها .. في محطات مكتوب عليها من فوق (request stop) دي لازم تشاور للاوتوبيس بايدك عشان يقف ف المحطة .. و لازم تدوس على زرار جنب باب الخروج عشان السواق يعرف انك عايز تنزل..

حاول تقعد ف مكان جنب الاشارة الالكترونية اللى بتقولك المحطة الجاية ايه عشان ما تتلخبطش

لو انت ف الدور اللى فوق لازم تنزل تقرب من الباب لما الاوتوبيس يقرب من المحطة اللى انت نازل فيها عشان ممكن على ما تنزل يكون الباب اتفتح و اتقفل و المحطة فاتتك

الركوبة ف الاوتوبيس الواحدة حتخصم من رصيد الاويستر 1 و نص استرليني مهما كانت المسافة اللى ركبتها

خلي بالك بعض خطوط الاوتوبيسات مش بتشتغل بعد 12 بالليل

خلي معاك ابليكشن اوبر للطوارئ .. اوبر لو اول مرة تستخدمه بيديك ركوبة مجانا لحد تكلفة 10 باوند

و انت بتعدي الشارع خلي بالك اتجاه العربيات معاكس للى الوضع عندنا .. فبص على الارض لما تيجي تعدي الشارع حتلاقي مكتوبلك المفروض تبص في انهي اتجاه على العربيات

طبعا ما تعديش الشارع غير من منطقة المشاة و لما اشارة المشاة تكون فاتحة .. خصوصا في الشوارع الرئيسية

اشارة المشاة في بعض الاماكن مش بتشتغل اوتوماتك .. لازم تدوس على زرار على الاشارة عشان يفتحلك الطريق و يوقفلك العربيات

ممكن بسبب الكورونا يبقي قواعد جديدة خاصة بالمواصلات زي ان لبس الكمامة ممكن يبقي اجباري مثلا .. ابقي اسال قبل ما تسافر على اي قوانين جديدة اتعملت

رابعا الاكل

المطاعم هناك فيها تنوع رهيب جدا من حيث الاسعار .. في حاجات فاخرة جدا بارقام مهولة و في حاجات رخيصة جدا و في حاجات وسط .. ممكن تشرب فنجان قهوة ب 1 استرليني و ممكن ب 35 استرليني .. فخلي بالك من ميزانتيك

المطاعم الحلال منتشرة جدا في وسط لندن و المدن الكبيرة .. حتلاقي مكتوب ع المحل من برا كلمة "حلال" بالعربي او الانجليزي و ممكن تسال عادي

دي خريطة معظم المطاعم الحلال .. ممكن تضيفها على اكونت جوجل مابس بتاعك

http://halalfoodguy.co.uk/restaurant-map/

و في مواقع تانية لطيفة

http://www.halalgirlabouttown.com

https://www.zabihah.com

http://halalgems.com

http://www.mybigfathalalblog.com

http://halalfoodguy.co.uk

 

البلد فيها مطابخ عالمية من كل حتة ف العالم .. حاول تجرب الاصناف المختلفة .. الاكل الايطالي الهندي الصيني الخ و هناك ممتاز فعلا

جرب موقع الفرست تابل .. احجز مطعم و خد اوفر 50% خصم

https://www.firsttable.co.uk

لو حتاكل ف مطعم .. الغدا بيبقي ارخص من وقت العشا .. و الاكل ف ايام الاسبوع ارخص من ايام الاجازات

المشروبات اللى حتطلبها جنب الاكل غالبا بتبقي غالية .. فممكن تنشن على وقت بعض المطاعم بتعمله اسمه ساعة السعادة (هابي اور) دي بتبقي ساعة ف وقت معين المطعم بيقدم فيها المشروبات مجانا

الاكل في محلات التيك اواي ارخص من المطاعم ..

الشيبس هناك يعني بطاطس محمرة .. انما الشبسي بيسموه كرسب .. اوعى تقول ف سوبر ماركت عايز شيبس :]

مع سيرة الاكل لازم نتكلم عن الشرب و الحمامات

الموقع ده في خريطة الحمامات العامة و بيرشحلك اقرب 5 ليك حسب موقعك

https://www.toiletmap.org.uk

لو مش لاقي نت خلي معاك الخريطة دي .. فيها اماكن محطات المترو اللى فيها حمامات

https://tfl.gov.uk/cdn/static/cms/documents/toilets-map.pdf

بعض الحمامات مجاني و بعضها بتحط كوين ب20 بنس او 50 بنس

و الموقع ده بيرشحلك اقرب اماكن فيها مياة شرب ممكن تشرب منها او تملى ازازتك

http://www.findafountain.org/

مع العلم ان عموما مياة الحنفيات في كل مكان في لندن نضيفة و صالحة للشرب

حتى مية الحمامات عادي .. بس ميزة اماكن الشرب ممكن تلاقي فيها ميه ساقعة طبعا ما تجيبش مية معدنية غالية ع الفاضي

خامسا الفلوس

العملة في بريطانيا هي الجنيه الاسترليني

ممكن تشوف سعره كام من هنا على موقع البنك المركزي

https://www.cbe.org.eg/ar/EconomicResearch/Statistics/Pages/ExchangeRatesListing.aspx

و الاسترليني فيه منه ورق من اول فئة 5 جنيه و طالع .. اقل من كده في كوين معدن و ده منه كوين ب 2 جنيه و ب 1 جنيه و بنص جنيه و 20 بني و 10 بني الخ

مش حتحتاج تجيب معاك مبالغ ضخمة لان كل مصاريفك هناك تقريبا ممكن تدفعها بالفيزا .. فحاول تجيب معاك الفيزا افضل و اتاكد من البنك بتاعك انها صالحة للاستخدام برا البلد

لو عايز تجيب كاش معاك ما تعتمدش على التحويل في لندن .. حاول تشتري استرليني من بلدك حيبقي اوفر ليك كتير.. ممكن تشتري الصرافات بحرية عادي و ممكن من البنك بتاعك بس ده لازم قبل السفر ب 48 ساعة و لازم تقدم صورة الفيزا و التذكرة و بيسمحلك تشتري ما يعادل الف دولار فقط بس ميزته انه سعره ارخص من الصرافات

لو اتزنقت و محتاج تشتري استرليني في لندن فده متاح ف مكاتب البريد بسهولة او ممكن تسحب كاش من المكنة باستخدام الفيزا .. بس حتخسر كتير لان البنك حياخد عموله كبيرة على التحويل

بعض الحمامات العامة بتكون بفلوس .. عليها بوابة الكترونية للدخول بتفتح لما تحط كوين ب 20 بيني .. فخلي معاك فكة احتياطي ف الشارع عشان حاجة زي كده

في العموم انجلترا دولة غالية مش رخيصة .. و لكن لحسن الحظ فيها تنوع كبير في مستويات المعيشة و الخدمات و السلع .. صعب احددلك انت ممكن تصرف كام ف المتوسط لان ده حيتوقف على المستوى الاقتصادي اللى حتعيشه

سادسا قواعد عامة

الطوابير مقدسة عن الانجليز .. اوعى تحاول تاخد مكان حد ف الطابور او تكسر نظامه ابدا .. حتجد ما لا يسرك.. بس ما تقلقش يعني في المجمل الطوابير عندهم مهما كانت طويلة بتمشي بسرعة

لو مش معاك خط تلفون انجليزي ممكن تشتري من المطار او من اي سوبرماركت او من مكاتب الشركات .. فودافون هناك كويسة .. خد حاجة بنظام pay as you go و اعتمد ف النت على واي فاي الاوتيل بتاعك و الاماكن العامة بابليكشن زي wifi finder و وفر الباقة بتاعتك في الشارع للحاجات المهمة زي التحركات و الجي بي اس

و بخصوص شراء الخط بص على الرابط ده حتلاقي نصايح مفيدة عشان توفر الفلوس

https://www.moneysavingexpert.com/phones/best-pay-as-you-go-sim-cards/?fbclid=IwAR1KoisqxDLfnwYsZinPxkz8W39h5ftvREYJ74m3sT1ovIxGHwZQ1V0q-nk

المناخ هنا خادع جدا .. و متقلب جدا .. خليك حذر و تابع نشرة الطقس اول باول .. و دايما خلي معاك شمسية او جاكت مطر

 

بخصوص قضية الأمان ما تقلقش البلد آمنة جدا و لكن للاحتياط اعرف شوية القواعد دول

رقم الطوارئ النجدة الاسعاف 999 و للبلاغات غير الطارئة زي التعرض للسرقة فيه رقم 101

ما تسيبش شنطتك او حاجتك في مكان عام و عينك مش عليها خصوصا في المطاعم و الكافيهات

لو عايز تسيب شنطتك الامانات عشان ما تمشيش بيها ف الشارع مؤقتا .. بخلاف الفندق في اماكن عامة ممكن تشيلها فيها

https://www.visitlondon.com/traveller-information/essential-information/baggage-left-luggage?ref=more-ideas

خلي بالك من النشالين في الاماكن السياحية ف اوقات الزحمة .. خلي محفظتك ف الجيب الامامي و خلي معاك نسخة في مكان تاني من ورقك المهم و الافضل ما تنزل بالباسبور ف الشارع .. اتحرك بصورة من الباسبور و صورة من الفيزا و خلاص و ما تشيلش معاك كاش بكمية ضخمة في المحفظة

خليك حريص من التعامل مع الغرباء الودودين زيادة عن اللزوم في الاماكن السياحية

تجنب التواجد في الشارع بعد 12 بليل لوحدك لغير الضرورة

خلي بالك من الناس اللى ممكن تتطوع تساعدك و انت بتستخدم كارت الفيزا في مكنة ايه تي ام .. ممكن يكون واحد بيشغلك و التاني بينشلك .. او يعرف الباسورد بتاعك و بعدين يقنعك ان الفيزا بتاعتك علقت جوا المكنة و مش حتطلع و روح اتصل بخدمة العملاء

للاسف عندهم زينا حوار النشل من على الموتوسيكل .. سواء موبايل او شنطة صغيرة .. موتوسيكل يقرب منك و يخطف الحاجة من ايدك و يجري .. فخلي بالك من حاجتك و خليك مصحصح للي بيحصل حواليك

حاول متخليش شكلك مغري للسرقة او باين عليك اوي انك اجنبي..

الموقع ده لطيف حيقولك ازاي تتعامل مع اي حادث او طارئ و في له ابليكشن اندرويد

https://www.citizenaid.org/