ازاي تعدي من الانترفيو

ازاي تعدي من الانترفيو

مقال أيمن زيادة 
نشر : محمد حسن 

حاقسم البوست للتعامل مع الانترفيو ل4 مراحل 

- مرحلة ما قبل الانترفيو

- مرحلة اثناء الانترفيو

- مرحلة ما بعد الانترفيو

- مرحلة ما بعد قبول الوظيفة 

أولا ما قبل الانترفيو

دلوقتي انت شغال تملى استمارات وظايف على موقع الان اتش اس جوبز و فجاة جالك الايميل السعيد انك مدعو لانترفيو بخصوص الوظيفة 

عادة لو تم اختيارك للانترفيو ، هيبعتولك بعد حوالي أسبوعين من تاريخ إغلاق إعلان الوظيفة على الموقع .. وعادة بتبقى المقابلة بعد أسبوع من إرسال الإيميل

محتاج تعرف 3 معلومات .. لو مش موجودين في الايميل اللى جالك اسال عليهم

1- 

الانترفيو تلفون و لا سكايب و لا وجها لوجه .. لو انت ف انجلترا او تقدر تسافر فالانترفيو وجها لوجه افضل كتير طبعا .. لكن لو اغلبنا في مصر ما نقدرش نسافر فالبديل بيكون انترفيو مكالمة فيديو ببرنامج سكايب .. لو هما مش واخدين بالهم انك برا البلد و لقيتهم بيوصفوا ليك عنوان المستشفى و مكان مكتب الانترفيو فابعت قولهم انك في مصر و ما تقدرش تسافر و عايز تعمل الانترفيو اونلاين .. مؤخرا بداوا يستخدموا برنامج جديد بدل سكايب اسمه مايكروسوفت تيم عشان الاجتماع الفيديو لو كذا حد من البانل بتاع الانترفيو في اماكن مختلفة 

2- ايه الورق اللى محتاج تجيبه معاك يوم الانترفيو .. بعض المستشفيات بيطلبوا انك تجيب الباسبور بتاعك .. بعض المستشفيات بيطلبوا حاجات تانية 

3- مين البانل اللى حيعملك الانترفيو .. اللى هما غالبا بيكون على الاقل 2 استشاريين منهم رئيس القسم زائد او ناقص حد من الاتش ار او المدير الاداري او كلاهما 

طيب حتبدا تستعد ازاي للانترفيو 

1) 

راجع كويس المعلومات اللى منشورة عن الوظيفة ال

 job description and person specification 

حيدوك فكرة كويسة عن النقاط اللى هما محتاجين يختبروك فيها ف الانترفيو فتكون مستعد 

2)

 حاول تقرا عن بنية الانترفيو و ازاي تستعد ليها .. في كتب كتيرة ع النت بس اللى انا استخدمته و عجبني جدا كان كتاب اسمه

Guide to CT, ST & Registrar Interviews

حيديك نصايح مهمة جدا اكيد حتفيدك و تخليك بروفيشنال و انت ف الانترفيو

في بعض السورسات التانية زي 

: في سورسات كتير للاستعداد للـ

 medical interviews.. حاول تقرأ سريعا أي حاجة منهم عشان تاخد فكرة عامة عن الدنيا بتمشي إزاي .. 

على سبيل المثال :

1- 

بلوج متجمع فيه بعض المقابلات السابقة في تخصصات مختلفة 

http://omarsguidelines.blogspot.com/2015/06/giving-successful-interview.html

2- 

كتاب ISC Medical Guide to CT_ST Interviews

3-

 ملخص كورس للمقابلات الطبية 

https://www.dropbox.com/s/m6z8tm9gylr9e18/Medical%20Interviews-%20Course%20Handouts.pdf?dl=0

3) 

سكايب او جوجل تيمز

لو انت مش متعود على سكايب  يبقي نزله و جرب استخدمه كذا مرة قبل الانترفيو مع صحابك عشان تتعود على التعامل معاه 

هو برنامج عادي جدا زي الماسنجر و الواتس و التليجرام و الزووم .. مفهوش حاجة غريبة او استثنائية 

تحسبا لاي مشاكل ابعت للاتش ار اساله على الاي دي بتاع السكايب اللى حيتعمل الانترفيو منه .. بحيث حصل اي مشكلة و ما اتصلوش او اتاخروا .. تقدر انت تبعتلهم 

نفس الكلام بخصوص برنامج مايكروسوفت تيم بس مفهوش أي دي .. فيه لينك بتفتح زي الزووم و طبعا لازم تكون مسطب البرنامج على جهازك قبلها 

4) لو تعرف حد شغال ف القسم حيبقي فرصة ممتازة .. اساله على الاستشاريين و نظام الانترفيو بتاعهم لانه اكيد جربه و لو في امكانية انه يكلم الاستشاريين عنك او يوصيهم عليك تبقي فرصة كويسة جدا برضه .. 

5)

 بتلاقي في كل وظيفة واحد اسمه 

contact person

...لو عايز تستفسر عن حاجه....بص يا سيدي..لو انت فعلا عاجباك الوظيفه و عندك ما يؤهلك ليها....لو انت شغال في انجلترا...ابعتله email ..و كلمتين حلوين وأنك عايز تزور المستشفى

informal visit..

وتعمل 

attach 

لل CV

....ده هيرفع أسهمك جدا وسط المتقدمين...

لو انت بره انجلترا...و ده أول وظيفة ليك ابعتلو نفس الكلام انت ليه مهتم و كلمتين حلوين

 و attach ال CV..بس طبعا صعب انك تقوله اجي ازورها.....

5)

 لو ما تعرفش حد في المستشفى .. ممكن تحاول تخلي السكرتيرة 

او ال

HR 

توصلك بواحد من اللي شغالين زيك في القسم ..او لو معرفتش ممكن تكلم ال

switch board بتاع المستشفى 

دي زي الكول سنتر بتاع المستشفى حتلاقي اكيد رقم المستشفى ع النت 

خليهم يوصلوك بالدكتور النباطشي اللي في وظيفة زي بتاعتك واستأذنه انك تتكلم معاه ٥ دقايق تعرف فيهم طبيعة الشغل و القسم (بيدوك فرص في العمليات - بيمضولك تدخل امتحان او ورق التدريب )

6) 

التجهيز ليوم الانترفيو

جهز المكان اللى حتعمل فيه الانترفيو يكون مكان هادي في اضاءة واضحة و سرعة النت فيه عالية محدش ممكن يدخل عليك الغرفة يقاطعك اثناء الانترفيو و الخلفية اللى وراك فورمال

لو حيطة بيضاء أو لون سادة أوك .. إنما ما يبقاش وراك حيطة عليها صور ممثلين وفنانين أو وراك باب مقفول وعليه شماعات وهدومك متعلقة عليه

انا شخصيا كنت باجر قاعة في سنتر فيه سرعة نت عالية 

و طبعا اللبس يكون فورمال .. و اعمل حسابك تكون جاهز قبل الانترفيو بساعة على الاقل 

الانترفيو مدته 10 ل 30 دقيقة في المتوسط

خلي بالك من فرق التوقيت بين مصر و انجلترا و انجلترا فيها توقيت صيفي و شتوي 

ثانيا الانترفيو نفسه

حاول تكون جاهز من بدري زي ما قلنا .. لو في اوبشن انك تدردش مع حد بالسكايب او مايكروسوفت تيم قبل الانترفيو بيكون لطيف لتخفيف التوتر

ابعتلهم رسالة قولهم انك جاهز للانترفيو لو انت على السكايب او افتح لينك مايكروسوفت تيم و استنى يدخلوك الميتنج 

حيبدا السكايب يرن مكالمة فيديو .. تمالك اعصابك و اهدي و استعن بالله و افتح المكالمة 

اول حاجة حيسلموا عليك و يبداوا يعرفوا بنفسهم 

تاني حاجة حيسالوك اهم سؤال .. عرفنا بنفسك او كلمنا عن السي في بتاعك

السؤال ده بيدي اول انطباع عنك الدنيا حتمشي ازاي و السؤال ده بالذات تقريبا لا يخلو منه انترفيو .. فاستغل ده و و جهز اجابة قوية جدا .. حاتتكلم فيه عن مسيرتك المهنية باختصار من اول التخرج لحد دلوقتي .. و كل مرحلة اتعلمت فيها ايه و استفدت منها ازاي .. و اتكلم عن امكانياتك و مهاراتك .. حاول تنوع في كلامك برا الكلينيكال .. اديهم فكرة عن اللى عندك فيما يخص القيادة و الادارة و التواصل و الريسرش و البريزنتشن الخ .. لو انت عندك سي في ضخم و طويل حاول تكون مختصر .. ركز على اقوى حاجة عندك و اعلى حاجة بتعرف تعملها في تخصصك

لازم حتتسال على كيس سيناريو عشان يشوفك بتفكر ازاي في حالة عملي او ازاي بتتخذ القرار

لازم حتتسال عن الجي ام سي ريجستريشن بتاعك

لازم حتتسال عن الريسرش و الاوديت و الكلينيكال جوفرنرنس.. اقرا عنهم كويس 

لازم حتتسال اسئلة غير اكلينيكية تبع الاتش ار .. قولنا مثال لموقف صعب اتعرضتله ف الشغل و اتعامل معاه ازاي و استفدت منه ايه .. او قولنا مثال عن زميل في الشغل كان عندك مشكلة معاه و اتصرفت ازاي .. عايز تتعلم ايه ف الوظيفة دي .. شايف مستقبلك ازاي في انجلترا . . شايف نفسك فين بعد 5 سنين. اخترت التخصص ده ليه.. إيه خططك وأهدافك اللي جاي عايز تحققها إيه الخ 

طبعا للتفصيل اكتر في شكل بنية الانترفيو و ازاي تتعامل مع الاسئلة دي انصحك ترجع للكتاب اللى انا ذكرته فوق

غالبا الانترفيو بيقفل بسؤال .. عندك اي اسئلة؟

في اسئلة مهمة ممكن تسالها لهم.. اسالهم عن نظام الشغل ف المستشفى و عدد ساعات العمل و جدول الاسبوعي .. اسالهم عن الفترة اللى حتقضيها تشتغل تحت اشراف حد سنيور لغاية ما تقدر تتعامل بنفسك .. اسالهم عن الاقامة ف المستشفى لو متوفرة .. اكد عليهم انك محتاجة شهادة COS عشان تقدر تطلع فيزا عمل تير-2 و اطلب انهم يحطولك فيها maintenance عشان ما تحتاجش تقدم كشف حساب بنكي و انت بتقدم ع الفيزا .. اسالهم عن المرتب و ايام الاجازات و اذا كان القسم حيساعدك في تكلفة كورسات تنمي فيها مهاراتك هناك .. لو معجبكش الوضع ف الشغلانة و حابب تمشي لازم تبلغ قبلها بفترة اد ايه .. اسال حتقدر تبدا شغل امتى و اول مرتب حتقبضه امتى .. لو دي وظيفة استشاري فمحتمل يدفعولك فلوس تكلفة الانتقال و السفر .. فاسال عليها 

لو انت في تخصص جراحي مثلا ممكن تسال هل تبقي في فرصة انك تتعقم في العمليات و لا لا 

في حاجات هيجاوبوك عليها في ساعتها ، وفي حاجات هيقولولك هنبعتلك إيميل فلان المسؤول تتواصل معاه و في حاجات حيقولوك حنقولك لو اتقبلت 

الانترفيو خلص؟
ما تمشيش .. اقعد اكتب الاسئلة اللى اتسالتك و اعمل تقييم لنفسك .. ده حيفيدك جدا لو لا قدر الله اترفضت عشان تبقي افضل ف الانترفيو اللى بعده 

ثالثا ما بعد الانترفيو 

غالبا حيردوا عليك في خلال من يوم لاسبوع بالكتير اوي اوي .. اغلب الناس بيتم الرد عليهم تاني يوم لو مش اجازة رسمية 

لو لا قدر الله اتقالك انك اترفضت حاول تسال عن السبب و تطلب فيد باك عشان تعرف العيب عندك فين و تحاول تصلحه

لو اتقالك انك اتقبلت ف الانترفيو خلي بالك من نقطة في غاية الاهمية هنا

لو ابديت قبول انت كمان او قلتلهم انك سعيد بالعرض فده معناه مجازيا كانك وقعت العقد بالظبط 

و ده معناه تاني انك خلاص لبست معاهم و ما ينفعش ترجع في كلامك

انا باقول الكلام ده ليه

هو طبيعي معظم الناس بتكون ما صدقت انها تتقبل ف انترفيو و عايز الوظيفة باي شكل

و لكن في ناس ممكن تكون عملت كذا انترفيو في وقت قصير و اتقبلت فيهم بتقارن بينهم مين الوظيفة الافضل

فخلي بالك هنا .. بمجرد انك تعلن او تبدي اي لمحة قبول بالوظيفة ده معناه انك اتدبست معاهم خلاص ما ينفعش ترجع ف كلامك

لان ده معناه انهم بعتوا لباقي المرشحين يتعذروا لهم انهم اترفضوا ف الانترفيو 

فلو انت رجعت في كلامك و قلت متاسف خلاص مش عايز الوظيفة حيبعتوا شكوى فيك للجي ام سي ممكن تؤدي انها توقف ترخيصك 

لانهم كده حيبقوا مضطرين ينزلوا اعلان وظيفة جديد و يعيدوا من تاني كل الاجراءات بتاعت عملية التوظيف من اول و جديد 

عشان كده نصحيتي ليك لما يجيلك ايميل يقولك انك اتقبلت .. تمهل قبل ما ترد عليه و فكر كويس و اسال زمايلك و خد نصايحهم

هل انت حابب تتفاوض معاهم على المرتب او اي امتيازات تانية و لالا .. هل مستني رد بخصوص انترفيو تاني و لا لا.. هل لسه عايز تقارن بين وظيفة تانية و لا لا .. كل ده مهم قبل ما ترد عليهم 

ممكن يكلموك بالتلفون .. ممكن يقولولوك ف الايميل لازم ترد خلال 24 ساعة و كلام من ده 

خليك تقيل شوية لو انت في موقف قوي و تقدر تتفاوض او عايز تقارن بين كذا وظيفة 

لو مفيش حاجة تخسرها و الاوفر كويس .. اتكل على الله و صلي استخارة و اقبل

طيب لو انا اتدبست و حابب ارجع ف كلامي

وافقت من الأول يبقى تتحمل المسؤولية للآخر .. توكل على الله وكمل وسافر وابدأ معاهم .. ولو ما عجبتكش المستشفى والشغل فيها ابقى غير براحتك بعدين طبقا للـ notice period اللي هما بيشترطوها .. وساعتها هتبقى سبتهم بهدوء وبطريقة شيك من غير مشاكل .

رابعا مرحلة ما بعد قبول الوظيفة 

مبروك انت اتقبلت في الوظيفة 

عشان تبدا شغل عمليا في لستة حاجات لازم تتعمل الاول اسمها 

Pre-employment checks

الحاجات دي بعضها بيتعمل هنا في مصر و بعضها بتكمله ف انجلترا لما توصل

1- حيعبتولك عقد الوظيفة حيبقي مطلوب منك تطبعه و تمضيه و تعمله سكان و تبعتهلولهم تاني

2- حيبعتولك شوية استبيانات تملاها .. اهمها يخص جدول التطعيمات بتاعك و اي امراض عندك و حالتك الصحية 

3- حيبعتوا للاستشاريين اللى انت حاطتهم ريفرنس يسالوهم عنك و لازم يردوا ويبعتوا انطباع كويس عنك

4- ال DBS و دي حاجة زي الفيش الجنائي عندهم .. استمارة بتملاها اونلاين و بتتبعت للبوليس عندهم يتاكد ان ملكش سوابق جنائية

5- حيطلبوا منك تبعتلهم اي شهادات تثبت ان عندك خبرة في مصر بعد التخرج.. دي مهمة جدا لانها حترفع مرتبك

6- استخراج شهادة COS و دي هما بيعملوهالك .. بيستخرجوا من وزارة الداخلية تصريح بالعمل ليك .. دي بتستخدمها عشان تقدر تقدم بيها على فيزا عمل في بريطانيا 

اللى حتكلمه ف انجلترا لما توصل

7- فحص الصحة المهنية .. حيسحبولك تحاليل عشان يتاكدوا ان معندكش فيروسات او امراض معينة و مش حينفع تبدا شغل غير لما النتيجة تطلع و دي ارخم حاجة لانها ساعات بتتاخر ممكن توصل لاسبوعين بالكتير

8- ال ID check: زيارة قصيرة لقسم الاتش ار يشوفوك و يراجعوا الورق بتاعك و يسجلوا بيانات باسبورك و حسابك البنكي الخ

9- الInduction: و دي زي جلسة تعريفية كده بالمستشفى و نظامها 

دول اشهر الحاجات بتوع 

Pre-employment checks

ممكن يكون في حاجات زيادة بتختلف من مستشفى للتانية .. ممكن يطلبوا شهادة حسن سير و سلوك من 

النقابة مثلا او فيش جنائي في مصر مترجم الخ

و شكرا جزيلا