ازاي تعدي الايام الاولى في انجلترا

  كتب أيمن زيادة 

نشر محمد حسن 

تنبيه يجي عليك مراجعة كافة المعلومات الواردة أعلاه طبقا لأحدث القوانين و الشروط الوارده فى المقال و المقال المنشور مكتوب طبقا لتجربة أو رأى شخصى لا يلزم أحدا و لا يلزم صاحب  المدونة بضم الياء  

حمدا لله ع السلامة .. انت وصلت السكن و استريحت من السفر .. في شوية حاجات اساسية لازم تتعمل في الكام يوم الاولانين مهمين جدا ركز معايا بقي

 

اولا كارت الاقامة ال BRP

 

اتكلمنا عنه بالتفصيل ف البوستين بتوع ازي تطلع فيزا العمل

 

تقريبا مش حتعرف تعمل اي حاجة من غيره .. و اول ما تخش البلد قدامك مهلة 10 ايام عشان تستلمه و الا حيدفعوك غرامة و يرحلوك من البلد ... و ال 10 ايام دول شاملين احتمالية ان يكون فيهم عطلات رسمية و اجازت نهاية الاسبوع .. عشان كده دي اهم حاجة تعملها

 

حتروح مكتب البريد اللى انت حددته في استمارة الفيزا بالجواب اللى جالك مع الفيزا و الباسبور و بتستلمه على طول .. مواعيد العمل من 9 ص ل 5 م ما عدا السبت و الاحد

 

لما تستلم الكارت راجع بياناته و اتاكد انها سليمة .. صوره على موبايلك .. شيله في مكان امن

 

ثانيا البوليس رجيستريشن

 

لما تدخل البلد قدامك مهلة 7 ايام عشان تروح اقرب قسم شرطة و تعمل حاجة اسمها بوليس رجستريشن .. لو اتاخرت عن ال 7 ايام ممكن حيدفعوك غرامة و يرحلوك من البلد.. عشان كده برضه مهم جدا

 

بتحجز معاد ع النت و تروحلهم .. بتجيب معاك الباسبور و كارت البي ار بي و عقد العمل و ورقة تثبت محل الاقامة سواء عقد ايجار لو انت مأجر او ورقة من الاتش ار تثبت انك قاعد ف سكن المستشفى

 

في قسم الشرطة بيراجعوا الورق بتاعم و يطلعولك شهادة ريجستريشن.. احتفظ بيها عشان مهمة.. و بيطلبوا منك انك تبلغهم لو غيرت محل اقامتك او حالتك الاجتماعية او وظيفتك الخ

 

لو انت ف لندن, بدل قسم الشرطة بتروح مكتب الاوفرو Overseas Visitors Records Office (OVRO) بس هي هي نفس الاجراءات عادي

 

ثالثا إخلاء قسم الصحة المهنية

 

المفروض انك تكون حاجز معاد معاهم قبل ما تيجي .. مهم تروحلهم بدري على قد ما تقدر عشان مش حينفع تبدا تشتغل بشكل رسمي و ينزلك مرتب الا بعد ما الفحوصات بتاعتهم تتعمل و ياكدوا خلوك من اي امراض .. حتروحلهم بالباسبور و عقد العمل و ورقة حجز المعاد .. حيسحبولك تحليل و تتابع معاهم النتيجة حتطلع امتى

 

رابعا افتح حساب بنكي

 

ده مهم عشان تقبض المرتب .. مفيش حد حيديك فلوس كاش هنا .. القبض كله بالفيزا فلازم يبقي عندك حساب بنكي عشان المرتب ينزلك عليه

 

شوف اقرب بنك ليك و احجز معاد ع النت لفتح حساب

 

حتجيب جواب من الاتش ار موجه للبنك مذكور فيه وظيفتك و مرتبك

 

حتروح ف المعاد للبنك معاك جواب الاتش ار و الباسبور و كارت البي ار بي و عقد الايجار

 

حتفتح حساب و تطلب من البنك يديك جواب للاتش ار بتاع المستشفى انه فتح ليك حساب .. حترجع بالجواب ده للاتش ار عشان يضيفوا عندهم في بياناتك رقم الحساب بتاعك عشان ينزل عليه مرتب .. و حتقدم في البنك برضه على كارت ائتمان كونتاكتلس عشان تصرف بيه .. لو طلعت ديبت كارد كمان البنك بيديك عليه مبلغ معين تقدر تصرف منه بضمان مرتبك و تسدده لما تقبض اول مرتب .. عشان كده مفيد جدا انك تطلبه

 

خامسا الجي بي

 

حتحتاج تسجل بياناتك عند اقرب عيادة جي بي عشان لو تعبت او محتاج تكشف بتروح عنده الاول .. وهو يكشف عليك ويقوم باللازم .. ولو محتاج تحويل على المستشفى بيحولك .. وممكن تدور على أقرب واحد ليك وتشوف التقييمات المختلفة من على الموقع ده

 

https://www.nhs.uk/service-search/find-a-GP

 

حتروحلهم في أوقات العمل الرسمية .. ومعاك الباسبور والـBRP وإثبات السكن (من المستشفى) أو (عقد الإيجار).. وهتملأ application form .. وممكن يدوك معاد تيجي تعمل فيه أول فحص طبي ليك معاه (check up) ..

 

ده مهم جدا لان معظم الادوية هنا مش بينفع تشتريها بنفسك من الصيدلية لازم روشتة دكتور جوا بريطانيا

بالمناسبة انت دفعت تامين صحي اثناء التقديم على الفيزا و بالمقابل بتحصل مجانا على خدمات الكشف الطبي عليك سواء في الجي بي او المستشفى و العلاج داخل المستشفى

و لكن لو في ادوية اتوصفتلك حتمشي عليها ف البيت انت بتدفع تمنها دي مش مجانا

الا في حالات استثنائية معينة مذكورة هنا

https://www.nhsbsa.nhs.uk/help-nhs-prescription-costs/free-nhs-prescriptions

 

سادسا اكسب نقاط المسافر الدائم

 

لو انت سافرت على خطوط مصر للطيران او اي شركة طيران تبع تحالف ستار اللى فاللينك ده

 

https://www.egyptair.com/ar/about-egyptair/Pages/star-alliance.aspx

 

ساعتها ممكن سجل بياناتك في برنامج الولاء (المسافر الدائم) او اجيبت اير بلس

 

دخل بيانات رحلتك بعد اسبوع من وصولك

 

البرنامج ده بيديك نقط على رحلة طيران تعملها و النقاط دي ممكن تاخد بيها عضوية ذهبية تديك اوبشن انك تركب في درجة رجال الاعمال او تسهيلات تانية بخصوص وزن الشنط او خصومات على سعر التذكرة الخ

 

سابعا احجز كورساتك

 

حسب المجال بتاعك اكيد في كورسات مهمة محتاج تحجزها الفترة الجاية .. حاول تحجزها بدري على قد ما تقدر عشان غالبا الحجز بتاعها غالبا بيكون بعيد جدا .. لو ما اخدتش في مصر كورس ALS لازم تحجزه .. لو انت جراحة شوف انت عايز ايه .. CrCISP مثلا او BSC و حجز امتحانات عضوية الكلية الملكية هكذا

 

ثامنا اشتراك ال MDU, BMA

 

الحاجتين دول اوبشنال اختياري مش ضروري تعملهم و مفيش استعجال عليهم .. ممكن تعملهم اي وقت

 

بجانب شغلك اللي المفروض إنك هتعمله على أكمل وجه.. معرض إن يحصل لا قدر الله أي مشكلة أو يتقدم فيك شكوى من مريض .. فا يستحسن يكون في حد أو جهة قانونية تلجأ لها في الأمور دي عشان هما هيبقوا أدرى منك بالتصرف السليم إيه ، في كذا هيئة في إنجلترا ممكن تشترك معاهم .. وأشهر حاجة هي الـ Medical Defence Union (MDU) .. ادخل على موقعهم واملأ الفورم وابعتها لاستكمال التسجيل والاشتراك.

 

BMA= British medical association

 

دي حاجة شبه نقابة الاطباء .. دورها مساعدة الاطباء و الدفاع عنهم و توجيه النصح ليهم .. بعض المستشفيات بتشترط ان ضروري يكون عنده عضوية فيها .. و عموما بتقدملك اشتراك في حاجة اسمها British medical journal و دي بيفتحلك سكة كورسات كتير مفيدة باسعار رخيصة

 

تاسعا الشوبنج

 

اول ما بتيجي بتكون محتاج تشتري حاجات كتير في البداية اساسية .. غالبا بما انك لسه جاي و مش فاهم الدنيا بتغرم نفسك مبالغ كبيرة ممكن توفيرها .. حقولك على شوية حاجات تتعمل في الحتة دي

 

1- راجع موقع https://www.moneysavingexpert.com/

 

بيديك نصايح ازاي توفر في كل حاجة تقريبا .. الموقع ده كنز حقيقي

 

2- موقع https://www.hotukdeals.com/

 

بيديك اخبار عن احدث العروض و الفرص في كل حتة تقريبا عشان لسه ماتعرفش مواسم التخفيضات هنا

 

3- موقع امازون https://www.amazon.co.uk/ لا غنى عنه تقريبا خصوصا انت لسه ف الاول مش عارف الحاجات اللى انت عايزها بتتباع فين .. فسهل تشتريها اونلاين .. اول ما بتعمل اشتراك فيه بيديك اوبشن اشتراك في نظام عضوية البرايم اللى بتديك خاصية دليفري مجانا لمدة شهر .. استغلها كويس

 

4- معظم السوبرماركتس بتعمل انظمة كروت ولاء بتديك نقاط على الحاجات اللى بتشتريها و كل ما تشتري تجمع نقط و النقط دي ممكن بعد كده تشتري بيها بدل الفلوس .. شوف اقرب سوبرماركت ليك حتتعامل معاه بانتظام و اشترك في برنامج الولاء بتاعه و قدم على الكارت بتاعه

 

5- مواقع لشراء الاشياء المستعملة.. بتكون مفيدة لما تكون عايز تجيب حاجة للتجربة و مش متاكد من مدى الجودة بتاعتها و السعر كبير

 

https://www.gumtree.com/

 

https://www.ilovefreegle.org/find/search/

 

6- لما تيجي تشتري حاجة راجع سعرها ع النت .. مرة لقيت جاكت في محل ب 40 باوند .. و لقيته تاني نفسه في مكان مختلف ب 200 باوند

 

7- اتعلم تطبخ .. حتوفر فلوس كتير جدا على الاكل الجاهز

8- الاجهزة الكهربائية و الالكترونية من الحاجات المكلفة .. اشهر الاماكن اللى بتبيعها بسعر معقول موقع Argos

9- ابليكيشن UK shopping بيبقي عليه تقريبا معظم المحلات و السوبر ماركت و ده بيديك فرصه أولا إنك تشتري الحاجات اونلاين لو عارف بالظبط إنت عايز إيه و كمان بيديك فرصه تعرف المحلات دي بتبيع إيه بالظبط بحيث تعرف تروح فين لما تعوز إيه.. خاصة الفترة الاولي بتبقي محيرة شوي

 

 

 

 

 

 

ازاي تتعامل جوا المستشفى

 

اولا بنية المنظومة الصحية في انجلترا

القطاع الصحي في بريطانيا جزئين ..قطاع خاص مالناش دعوة بيه دلوقتي .. و القطاع الحكومي .. القطاع الحكومي على رأسه وزير الصحة مات هانكوك في حكومة بوريس جونسون حاليا و هي بيتكون من عدة هيئات بتقوم بوظايف مختلفة

زي هيئة تنظيم الدواء اللى بتدي الترخيص للادوية و هيئة الصحة العامة و دي المسئولة عن الوقاية و التوعية شبه الطب الوقائي عندنا في مصر و هيئة الزرع و الدم و دي مسئولة عن تنظيم التعامل مع اي حاجة تخص الانسجة البشرية زي عمليات زرع الاعضاء و البحث العلمي الخاص بالحاجات دي و ادارة بنوك الدم و هيئة التعليم الصحي و دي مسئولة عن برامج التدريب بتاعتنا و غيرها من الهيئات

من ضمن الهيئات دي اسمها الان اتش اس يعني نظام الصحة القومي

الان اتش اس بتتكون من حوالي 217 تراست .. التراست هي وحدة إدارية جوا الان اتش اس عبارة عن عدة انواع

نوع تراست الصحة النفسية ده مسئول عن ادارة المصحات النفسية فقط و نوع تراست الاسعاف و ده مسئول عن ادارة خدمة الاسعاف و نقل المرضى الخ

اللى يهمنا نوع تراست المستشفيات و دي مسئولة عن الخدمات الصحية المباشرة كمستشفيات و عيادات اسنان و جي بي و صيدليات

تراست المستشفى غالبا بيكون اسمها على اسم المستشفى الرئيسية اللى بتديرها .. علما بانها ممكن تكون بتدير مستشفى واحدة او اكتر من مستشفى في نفس المنطقة الجغرافية اللى بتغطيها و احيانا بتدير كمان مراكز علاجية صغيرة و عيادات جي بي في المنطقة بتاعتها

لما بتقدم على وظيفة احيانا العقد بتاعك بتلاقي يشمل روتيشن في اكتر من مستشفى تحت نفس التراست .. يعني وارد انك تكون مكان شغلك الاساسي في مستشفى معينة و احيانا بيبقي عليك واجب انك تقوم بخدمات في المستشفيات التانية الثانوية دي

المستشفى حتحسها عاملة زي الشركة في مصر .. حتلاقي فيها مدير و مدير تنفيذي و مجلس ادارة و قسم تسويق و قسم ال IT و مدير فني و مدير مالي و اداري و ليله كبيرة من اعضاء البورد .. غالبا دول مش حتتعامل معاهم بشكل مباشر لو انت ف مستشفى كبيرة و لكن بيبعتولك ايميلات بشكل دوري غالبا

ثانيا انواع الستاف اللى حتتعامل معاهم ف المستشفى

الستاف الاداري

1- الاتش ار .. الناس اللى كنت مش طايقيهم عشان مش بيردوا على الايميلات حتكتشف انهم ودودين جدا و شايلين شغل كتير فعلا .. غالبا علاقتك بيهم حتكون في بداية الشغل بس .. بتعمل عندهم الاي دي تشيك و بتاخد منهم الجواب اللى بتوديه للبنك عشان فتح الحساب و حيمضوك على ورق كتير الخ .. بعد كده غالبا مش حتحتاجهم الا اذا في مشكلة انك محتاج مساعدة فيها تخص وضعك الوظيفي او لو عايز تطلع بيان حالة وظيفية لاي سبب او جواب لسفارة فرنسا لو عايز تطلع فيزا شنجن مثلا الخ

2- اللاين مانجر.. ده مدير اداري للقسم بتاعك.. الشغلانة دي مش موجودة في مصر .. ده مش طبيب ده موظف اداري مش بيفهم في شغل الكلينكال بس هو اللى بينظم جدول النباطشيات بالتعاون مع حد من سناير القسم .. غالبا بتقدمه طلبات الاجازة سواء اعتيادي او مرضي و بيوافقلك عليها و لو عايز تسيب الشغل عشان تشتغل في مكان تاني ده اللى بتبلغه ..

الستاف الطبي

1- الاستشاريين: دول اعلى درجة وظيفية اكلينيكية .. حتلاقي منهم مدير القسم و المشرف العلمي بتاعك و المشرف على تدريبك .. ممكن شخص واحد يكون قايم بكل الوظايف دول عادي لو القسم صغير .. ممكن يكون منهم استشاريين اساسيين او لوكام .. لوكام يعني تعاقد لفترة مؤقت مش متثبت ف المستشفى .. الدكاترة دول هما اللى معاهم الحق يشتغلوا بشكل مستقل بدون اشراف من حد اعلى منهم و هما المسئولين عن شغل الدكاترة اللى تحتهم .. هما اللى ممكن يمضولك على اي استمارات انت محتاجها عشان تقوي السي في بتاعك

2- الدكاترة السناير سواء ريجسترار او سنيور كلينيكال فيلو او اس تي 3-7 .. ايا كان المسمى .. بيتشغلوا تحت اشراف الاستشاري .. على حسب ثقة الاستشاري فيهم ممكن يديلهم ادوار توصل لدرجة انهم يحلوا محله في غيابه بالكامل

3- الدكاترة الجناير سواء امتياز FY او جونير كلينيكال فيلو او SHO .. دول خط المواجهة الاول .. اول حد يشوف المريض و بيتعامل معاه .. بيقوموا بالاعمال البسيطة زي التوثيق .. سحب التحاليل .. تركيب كانيولا.. كتابة ملخصات الخروج ..تجهيز لستة العمليات .. الكشف على العيان و تسجيل التاريخ المرضي و ممكن وصف الادوية و طلب الفحصوات بعد استشارة السنيور اللى معاهم

4- طلبة كلية الطب: اغلبهم دورهم بيتفرجوا و يتعلموا و يسالوا .. ممكن يساعدوا الدكاترة الجناير في شغلهم .. ممكن يطلب منك تشرحلهم موضوع معين لان ليهم المفروض جدول سيشنز تعليمية

5- التمريض: من اهم الستاف في المستشفى و حيساعدوك جدا تفهم الدنيا و اغلبهم عندهم خلفية علمية محترمة و تدريب عالي مش زي الوضع المؤسف في مصر خالص .. حاول تخلي علاقتك بيهم كويسة حتتعلم منهم كتير .. لو قفشت معاهم ممكن يخلوا حياتك جحيم .. انواع التمريض كتيرة جدا في التمريض الأساسي و دورهم تنفيذ العلاج و تسجيل الملاحظات و التغيير على الجروح و عمل بعض الفحوص زي رسم القلب و مسح المثانة بجهاز موجات صوتية (سونار) و فيه التمريض المتخصص و دول بيقوموا بأدوار متنوعة حسب تخصصهم زي تمريض الكلى .. تمريض السكر .. تمريض ادوية السيولة .. تمريض الستوما .. الخ و دول ممكن يشيلوا عيادات بنفسهم و متابعة المرضى بعد خروجهم من المستشفى .. و في طلبة التمريض او الممرضات اللى تحت التدريب و دول بيتعلموا وبيشتغلوا تحت اشراف الممرضات الاكبر منهم و في التمريض السنيور او الميترون و دول ممرضات ذوي منصب رفيع بيشرفوا على جميع ما سبق

6- الصيدلي الاكلينيكي: دوره مراجعة العلاج اللى بيتم وصفه للمرضى و اعتماده أو نصح الأطباء بإجراء تعديلات عليه

7- فني الصيدلية: دوره وسيط بين الصيادلة و الاطباء من جهة و صيدلية المستشفى من جهة و التمريض الذي يقوم بتنفيذ العلاج من جهة فهو يراجع توافر الأدوية المطلوبة و اعادة الفائض و مراجعة تاريخ الصلاحية و يقوم بالعديد من الأعمال المكتبية و خلافه

8- الفلوبوتوميست: ده بيمر الصبح على العنابر يسحب التحاليل الروتينية المطلوبة من العيانين ف العنبر

9- اخرون بيقوموا بوظائف متعددة زي بتاع التخاطب و العلاج الطبيعي و التغذية و

باقي الموظفين

في انواع كتير جدا من الموظفين بيختلفوا عددهم و انواعهم و وظايفهم حسب كل المستشفى و حسب كل عنبر

حاذكر بعض الامثلة

1- موظفين خدمة الضيافة: دورهم يشبه مضيفة الطيران إن جاز لنا التشبيه ..بيمروا بشكل دوري على المرضى بالطعام و المشروبات

2- مساعدي التمريض: بيستخدموا أجهزة الكترونية لقياس العلامات الحيوية مثل الضغط و الحرارة و معدل النبض و التنفس و مستوى تشبع الاكسجين و نسبة السكر في الدم و حساب نسبة السوائل الداخلة و الخارجة في جسم المريض و حساب وزن المريض الخ

3- عمال النقل و دول بينقلوا المرضى للأقسام التانية لعمل فحوصات معينة أو للعمليات او للحمام أو للزيارة أو للاستمتاع بالهواء الطلق خارج المستشفى الخ و و بيهتموا بحاجات تخص نقل المريض زي وسيلة النقل كرسي و لا تروللي و احتياجه لاسطوانه اكسجين و احتمالية وجود عدوى قابلة للانتقال أثناء النقل ال

4- مديري الأسرة (جمع سرير) : و هم المسئولين عن تنظيم عملية حجز و خروج المرضى من العنبر و توفير الأسرة للحالات المخطط حجزها و حالات التحويل من المستشفيات التانية الخ

5- عمال النظافة: و دول بيغيروا الملايات و أغطية الأسرة و ملابس المريض و مساعدته على الاستحمام و العناية بنظافته الشخصية مثل الحلاقة و دول بخلاف عمال نظافة العنبر المسؤلين عن تنظيف الغرف و الاسطح

6- عمال الصيانة: و دورهم تصليح او تغييرأجهزة الأضاءة و التلفاز و المكيفات في حالة حدوث عطل لأي منها

7- موظفين الاستقبال: و هم أشبه بالسكرتارية بيقعدوا في مكتب لاستقبال حالات الحجز و انهاء اجراءات حالات الخروج و القيام بالأعمال المكتبية و الرد على التلفون و البريد الورقي و الالكتروني و الفاكس الخاص بالعنبر و خلافه

و للامانة في ناس تانية انا معنديش فكرة عن طبيعة شغلهم

ثالثا الروتين

الروتين اليومي لشغل العنبر طبعا بيختلف حسب التخصص بس ف الاغلب ده الشكل المعتاد بتاعه

1- الدكاترة بيجيوا الصبح بيستلموا من اللى كانوا سهرانين في نباطشية النايت

2- بيبصوا على الحالات اللى ف العنبر

3- بيجي الاستشاريين و يعملوا المرور الصباحي .. بيتم فيه عرض كل حالة في العنبر و مناقشة وضعها و اتخاذ قرارات او اجراءات مطلوبة تتعمل لها

4- بيبدا الدكاترة يوزعوا على نفسهم الشغل في الحاجات اللى المفروض تتعمل للعنبر

5- في حاجات تانية برضه بتتعمل حسب التخصص زي التبليغات من الاقسام و العنابر التانية و حالات الطوارئ و العيادات و لستة العمليات الخ

6- بعد الساعة 5م بيبقي متبقي عدد اقل موجودين للتعامل مع حالة طارئة و استكمال بعض الحاجات البسيطة المتبقية من شغل الصبح

رابعا حاجات جديدة علينا مش موجودة في مصر

1- اسامي العنابر اسماء حقيقية ..مفيش عنبر الكلى و عنبر الاطفال و عنبر النسا .. حتلاقي اساميهم عنبر وليام شكسبير و عنبر دوبي و عنبر صقور القيصر الخ .. طب انا اعرف التخصص بتاعه ازاي؟ لازم تسال

2- البليب .. ده جهاز استدعاء بتحطه ف جيبك او تعلقه ف حزامك .. له نمرة من 4 ارقام معين لازم تبقي حافظه .. دي وسيلة التواصل معاك لو في حاجة طارئة .. بيبقي فيه شاشة مكتوب عليها ان رقم تلفون معين عايز يكلمك .. فلازم تروح لاقرب تلفون و تتصل بيه بسرعة .. و يفضل تكون مجهز معاك ورقة و قلم عشان تاخد بيانات الحالة اللى حيكون بيكلمك عنها

3- و انت ف العنبر في نوعين من الجرس ممكن تسمعهم .. واحد خاص بانذار الحريق و 99% بيكون انذار كاذب للتدريب على التعامل مع حالة الحريق .. و التاني بيكون لحالة كراش زي ان مريض عندك في العنبر ارست او في بيموت .. ساعتها لازم تسيب اللى في ايدك و تجري عليه

4- الشبكة بتاعت المستشفى .. بعض الاماكن في انجلترا نظامها كله الكتروني مفيش ورق نهائي و بعضها جزء من النظام الكتروني و جزء منه ورقي و قليل جدا اللى لسه ماشي على النظام الورقي القديم .. معظم المستشفيات عندها شبكة داخلية عليها كل بيانات المرضى و ملفاتهم و تذاكرهم و تحاليلهم و اشعتهم و ممكن تستخدم السيستم ده لطلب اي اوردر زي تحاليل او اشعة او حتى وصف العلاج و اهم حاجة التوثيق في تذكرة العيان اي حاجة بتتعمل

5- الكومبيوتر المحمول .. ده زي لاب توب على تروللي بعجل عشان تمشي بيه العنبر .. بيستخدم غالبا اثناء المرور الصباحي .. غالبا بتبقي شغلانة دكتور جنيور انه يوثق اللى بيتم في المرور و خطة العلاج بتاعت الاستشاري

6- ال DNR .. في حاجة اسمها ال treatment escalation plan و دي معناها لو المريض حالته تدهورت هل حنبذل كل حاجة نقدر عليها لانقاذ حياته و لا في مرحلة معينة حنقف عندها و نسيبه يموت في سلام؟ طبعا بغض النظر عن الاشكالية الاخلاقية عندنا كعرب او مسلمين مع الموضوع ده فهو قانون عندهم في انجلترا .. بمعنى ان المريض من حقه يطلب ان لو قلبه وقف مش عايز يحد يعمله انعاش قلبي رئوي او لو جاله فشل تنفسي مش عايز فنتليتور او تركيب انبوبة حنجرية .. في الغالب لو المريض مسن و عنده امراض مزمنة كتير فالاستشاري بيقترح عليه انه يوافق على ال DNR ..و ده لان عدد المسنين كبير و متوسط الاعمار مرتفع .. عادي جدا تقابل كتير فوق ال80 و ال 90

7- احترام خصوصية العيان .. لما نيجي نتكلم مع مريض بخصوص حالته في العنبر لازم نشد الستاير عشان الخصوصية .. ما ينفعش نتكلم مع حد من اهله بخصوص حالته الا بعد استئذانه

خامسا بعض المصطلحات الغريبة

Clerking

يعني شيت العيان و تشمل انك هيستوري و اكسزامنيشن و مناقشة التشخيص و خطة العلاج مع حد سنيور و توثيق الكلام ده

TTO

ملخص الخروج .. بتحكي فيه قصة العيان من الالف للياء .. قبل ما يتحجز ف المستشفى ايه تاريخه المرضي .. اتحجز ليه .. و التشخيص و الفحوصات اللى اتعملت و خطة العلاج و خطة الخروج و مواعدي المتابعة و الادوية اللى حيمشي عليها

Next of kin

يعني اقرب حد للمريض .. سواء قريبه او صديقه او بوي فريند الخ

package of care

يعني المريض بعد ما يروح البيت حننسق ان حد من الخدمات الاجتماعية حيزوره بشكل دوري لمساعدة المريض في العناية بالبيت و باحتياجاته الشخصية لو هو مسن و ساكن لوحده

Care home

ده حاجة زي دار المسنين كده .. مصمم لرعاية ذوي الاحتياجات الخاصة .. مفهوش سلالم .. حمامات مجهزة بشكل معين .. الخ

Nursing home

دي زي دار المسنين بس فيه تمريض ممكن ينفذ علاج لمريض محتاجة رعاية طبية بسيطة بس مش ضروري يفضل محجوز ف المستشفى

DOLS: Deprivation of Liberty Safeguards

ده يعني المريض معندوش القدرة العقلية على اتخاذ قرار يخص حالته او ابداء الموافقة او الرفض على اي حاجة سواء عنده عته او من ذوي الاحتياجات الخاصة او في غيبوبة او طفل صغير بدون اهل او ولي الخ .. فبيبقي فيه تيم مخصوص ف المستشفى لتقييم اي حاجة محتاجة موافقة المريض و اتخاذ الاجراءات اللى فيها مصلحة له

سادسا الحاجات الاساسية اللى تتعمل اول ما تيجي

1- بتحضر الانديكشن سيشن و دي زي جلسة تعريفية عن المستشفى و نظام الشغل و شوية حاجات اساسية لازم تعرفها

2- اعرف الستاف اللى انت شغال معاهم و خد ارقام تلفوناتهم و ادخل على جروب الواتس بتاعهم واعرف جدول القسم و اعرف اساميهم المفضلة .. في ناس بتفضل تناديها بالاسم الاول عادي برفع التكلفة و ناس بتفضل الالقاب

3- اعرف اماكن المستشفى الاساسية: العنبر .. الطوارئ .. العناية .. العمليات .. العيادة .. المطعم .. الكافيتريا .. استراحة الاطباء

4- بعض المستشفيات بيبقي فيها اي موديولز اساسية و دي زي كورس اونلاين صغير كده عشان تعرف تتعامل النظام -الالكتروني للمستشفى و الشبكة الداخلية بتاعتها.. خلصه

5- اطلب ان يتعملك ايميل NHS حتحتاجه في حاجات كتير

6- معظم المستشفيات بيبقي ملحق بيها غرفة للصلاة للمسلمين اسال على مكانها .. ممكن يكون اسمها

CHAPEL, PRAYER ROOM, MUSLIM ROOM, SPRITITUAL CENTER, ETC

7- اسال اذا كان في امكانية يبقي ليك خزنة لوكر بتاعت تشيل فيها حاجاتك ف الشغل

8- اسال على مكتبة المستشفى و لو محتاجة استمارة تتملى عشان تشترك فيها املاها و تعرف على خدماتها بتكون مفيدة جدا و احيانا بتديك اكسس على مواقع الابحاث العلمية اللى بفلوس

9- نزل الابليكشنز دول على موبايلك

http://www.microguide.eu/

الجايد لاينزل بتاعت استخدام المضادات الحيوية .. مش بمزاجك .. يا تمشي عليه يا ما تستشير ريجسترار الميكرو قبل ما توصف اي مضاد حيوي

https://induction-app.com/

عليه ارقام مكاتب و اماكن كل الاقسام و كل النباطشيين في كل مستشفيات انجلترا

https://www.bnf.org/products/apps/

الجايد لاينز بتاعت وصف الادوية عموما و تفاعلاتها مع بعض و تعديل الجرعات في مرضى الكلى و الكبد الخ