ازاي تدخل برنامج تدريبي في انجلترا

 

كتب أيمن زيادة 

نشر محمد حسن 

تنبيه يجي عليك مراجعة كافة المعلومات الواردة أعلاه طبقا لأحدث القوانين و الشروط الوارده فى المقال و المقال المنشور مكتوب طبقا لتجربة أو رأى شخصى لا يلزم أحدا و لا يلزم صاحب  المدونة   

أولا فايدة البرنامج التدريبي :

لعل دي واحدة من أكبر المميزات بتاعت سكة انجلترا و هي ان فيها امكانية انك تدخل برنامج تدريبي قوي محترم له وزن عالمي و شهادته تقيلة في اي مكان

الغرض الرئيسي لدخول البرنامج التدريبي هو الحصول على ترخيص من الجي ام سي اسمه specialty registration و ده اللى بيديك الامكانية انك تمارس مهنة الطب بدون اشراف سنيور عليك و انك تقدر تشتغل بوظيفة سبيشيالتي ريجسترار ثم وظيفة استشاري

الطريقة التانية للحصول على الترخيص ده اسمها طريقة السيزار CESR و هي انك تقدم شهادات و ورق كتير جدا يثبت ان عندك نفس امكانيات و خبرة الدكتور اللى خلص البرنامج التدريبي بتاعهم.. و الطريقة دي مناسبة جدا ليك لو انت اخصائي قديم او استشاري في مصر

الطريقة دي مش موضوعنا في البوست ..بس اللى حابب يعرف عنها د. بشير كان عامل فيديو ممتاز شرحها بالتفصيل مع د. مختار هنا في الرابط ده

https://www.facebook.com/groups/993713937321092/permalink/3836712309687893/

ثانيا أنواع البرنامج التدريبي :

طيب انت عايز تخش برناج تدريبي .. البرنامج التدريبي 3 انواع

النوع الاول: الجي بي ... ده اسهل واحد .. 3 سنين و تبقي استشاري

النوع التاني: بيبقي طويل شوية من 5 ل8 سنين .. زي النسا و الرمد و الاطفال الخ و ده لازم تبدأه من الأول .. في امكانية انك تدخله في النص بس صعب شوية لان مفيش اعلانات وظايف بتنزل كتير

في كل سنة بتتقيم ينفع تعدي السنة الي بعدها ولا لأ و بعد تالت سنة هل تصلح ريجسترار ولا لأ و في الاخر بتتقيم ينفع تبقى كونسلتانت ولا لأ... و من ضمن التقييمات دي لازم تعدي امتحانات معينة زي عضوية الكلية الملكية قبل السنة التالتة و زمالة الكلية الملكية قبل السنة الاخيرة و انواع امتحانات تانية مختلفة على حسب التخصص ..

النوع التالت: بيكون برنامج متقسم لنصين ..نص في تخصص رئيسي و النص التاني فيه تخصص فرعي

بمعنى التخصص الرئيسي باطنة عامة سنتين و بعدين تاخد تخصص فرعي2-4 سنين كمان زي عصبية .. صدرية .. قلب.. كلى .. غدد .. دم .. روماتيزم الخ

او تخصص رئيسي جراحة عامة و بعدين تاخد تخصص فرعي زي جهاز هضمي .. كبد .. شرج وقولون .. اوعية .. تجميل .. مسالك .. عظام .. الخ

او تخصص رئيسي طب حرج و بعدين فرعي عناية .. تخدير .. طوارئ .. الخ

ايه الفرق؟ الفرق انك في حالة النوع التالت ممكن تبدا من اول البرنامج عادي في التخصص الرئيسي .. و ممكن تبدا من اول التخصص الفرعي (السنة التالتة)

ثالثا متطلبات الدخول في برنامج تدريبي :

طب اختار ايه؟ ادخل من السنة الاولى و لا من التالتة؟

ده على حسب مستواك المهني و خبراتك

افتح الرابط ده

https://specialtytraining.hee.nhs.uk/Recruitment/Person-specifications

حتلاقي ملفات بي دي اف بتشرحلك ايه المتطلبات بتاعت التقديم على البرنامج التدريبي في كل تخصص في كل مستوى

خلينا ناخد على سبيل المثال الجراحة العامة و قس على ذلك باقي التخصصات لان الاختلافات بينهم مش كبيرة

المطلوب منك عشان تقدم على برنامج تدريبي جراحة عامة من اول سنة الآتي

https://specialtytraining.hee.nhs.uk/portals/1/Content/Person%20Specifications/Core%20Surgical%20Training/Core%20Surgical%20Training-%20CT1.pdf

1- شوية حاجات معانا كلنا: بكالريوس كلية طب – ترخيص الجي ام سي

2- استمارة الكريست و دي استمارة بتشهد انه مستواه المهني يعادل حد خلص الامتياز بتاع انجلترا .. بتكون ممضية من استشاري و مختومة بختم المستشفى .. نزلها من الرابط ده

https://www.oriel.nhs.uk/Web/ResourceBank/Edit/MTA3NA%3d%3d

الشهادة دي ينفع استشاري في مصر يمضيهالي و لا لازم من انجلترا؟

الحقيقة مش متاكد لاني سمعت كلام متضارب في النقطة دي .. بس لو تقدر تمضيها من الاستشاري بتاعك في انجلترا يبقي اضمن طبعا و اظن لو انت دكتور كويس اي استشاري في انجلترا اشتغلت معاه 3 او 4 شهور مش حيمانع يمضيهالك

و دي من فوايد انك تيجي الاول على سرفيس جوب انك تكمل الشهادات دي .. و بالمناسبة لازم تكون حديثة .. لان كل سنة بتنزل منها فورمة مختلفة .. ما ينفعش تقدم على وظيفة في 2021 باستمارة من 2019 مثلا

3- ممارسة الطب بعد التخرج لمدة من سنة الى سنة و نصف (غير شاملين فترة الامتياز).. و دي مشكلة لو انت خريج قديم و عايز تخش التريننج من اوله .. عشان كده بانصح كل الصغيرين طلبة الطب و الامتياز و اللى لسه متخرجين يلحقوا يجيوا بسرعة عشان ما يضيعش عليهم فرصة الدخول في البرنامج من السنة الاولى لان الدخول في سنة متقدمة له شروط اصعب بكتير

4- شوية مهارات عامة حتتقاس ف الانترفيو و مش موضحين بشكل دقيق اذا كان فيه حد ادنى للقبول فيها : المعرفة العلمية بالتخصص – التعامل مع حالة الطوارئ (الاسعافات الاولية) – ادراك اهمية البحث العلمي و قواعده الاساسية - القدرة على ترتيب الاولويات – ادراك حدود قدراتك – مهارات التواصل و اتخاذ القرار و التخطيط و العمل الجماعي الخ

5- كلام عام جدا: مفيش موانع من ممارسة الطب ف انجلترا – معندكش سوابق اجرامية – الانجليزي بتاعك كويس- معندكش مشاكل صحية تمنعك من الشغل – لم يتم طردك من برنامج تدريبي قبل كده

م الاخر يعني محدش بيبقي عنده اشكالية في اي حاجة في شروط التقديم غير الشرط السخيف بتاع انك تكون حديث التخرج من سنة ل سنة و نص .. الباقي كله امور بسيطة

طيب انا حققت كل الشروط .. كده انا ضمنت اني حتقبل؟ لا طبعا لان في غيرك كتير جدا حققوا كل الشروط برضه و عدد الاماكن محدود و بالتالي حيتم تقييم الجميع في الاستمارة و في الانترفيو و على اساسه حيتقبل افضل المتقدمين ..

طب اعمل ايه عشان اتقبل؟ قوي السي في بتاعك زي ما شرحنا في بوست "ازاي تقوي السي في" عشان تبقي منافس قوي مع المرشحين التانيين و تتقبل باذن الله

طيب انا عندي مشكلة السنة و نص دي .. انا خريج بقالي فترة اكبر من كده .. يبقي الاوبشن الانسب ليك هو انك تقدم على التدريب في التخصص الفرعي مباشرة ST3

ايه شروط المطلوبة هنا؟

برضه تعالى ناخد على سبيل المثال شروط ال ST3 للجراحة العامة و حتلاقي باقي البرامج في نفس المستوى مشابهة الى حد كبير

https://specialtytraining.hee.nhs.uk/portals/1/Content/Person%20Specifications/General%20Surgery/General%20Surgery-%20ST3.pdf

شروط التقديم

1- شوية حاجات معانا كلنا: بكالريوس كلية طب – ترخيص الجي ام سي

2- استمارة الكريست و دي استمارة بتشهد انه مستواك المهني يعادل حد خلص الامتياز بتاع انجلترا .. بتكون ممضية من استشاري و مختومة بختم المستشفى .. نزلها من الرابط ده

https://www.oriel.nhs.uk/Web/ResourceBank/Edit/MTA3NA%3d%3d

3- استمارة الكريهست و دي استمارة بتشهد انه مستواك المهني يعادل حد خلص التدريب الاساسي بتاع الجراحة العامة.. بتكون ممضية من استشاري و مختومة بختم المستشفى برضع.. نزلها من الرابط ده

https://www.oriel.nhs.uk/Web/ResourceBank/Edit/MTEyNQ%3d%3d

4- ممارسة الطب بعد التخرج لمدة من سنة الى 4 سنين (غير شاملين فترة الامتياز).. و ده مش شرط اساسي ده مستحب .. يعني لو اكتر من كده عادي مش ازمة تتقبل برضه

5- شوية مهارات عامة حتتقاس ف الانترفيو و مش موضحين بشكل دقيق اذا كان فيه حد ادنى للقبول فيها : المعرفة العلمية بالتخصص – المهارات الجراحية و تقدم لوج بوك العمليات بتاعك– التعامل مع حالة الطوارئ– ادراك اهمية البحث العلمي و قواعده الاساسية - القدرة على ترتيب الاولويات – ادراك حدود قدراتك – مهارات التواصل و اتخاذ القرار و التخطيط و العمل الجماعي الخ

6- تكون خلصت ال MRCS او عضوية الكلية الملكية المناظرة في التخصصات التانية

7- تكون خلصت الكورسات الجراحية الاساسية زي ال ATLS, BSS, CrISP

8- تكون شاركت في أوديت واحدة على الاقل بالاضافة أنشطة لتعليم او تدريب حد أصغر

9- كلام عام جدا: مفيش موانع من ممارسة الطب ف انجلترا – معندكش سوابق اجرامية – الانجليزي بتاعك كويس- معندكش مشاكل صحية تمنعك من الشغل – لم يتم طردك من برنامج تدريبي قبل كده

و بالتالي من الواضح ان الشروط اصعب طبعا و المنافسة كمان اشد لان الاماكن المتاحة اقل و الاقبال عليها اكبر خصوصا في التخصصات الدقيقة و لكن الوضع مش مستحيل .. بشوية جهد و صبر حتجيب الشروط كلها ان شاء الله

لو انت حديث التخرج سافر على طول في اسرع فرصة و الحق ادخل البرنامج التدريبي من اوله اسهل .. لو انت عديت السنة و نص اشتغل على الحاجات اللى ناقصاك و قوي السي في بتاعك و قدم على ST3 و لو لا قدر الله ما تقبلتش قدم تاني و تالت و رابع لحد ما تيجي ان شاء الله

عن متطلبات كل برنامج لمزيد من التفاصيل

1 - افتح اللينك ده :

https://www.oriel.nhs.uk/Web/Vacancies

لو اللينك دخلك على الصفحة الرئيسية، من staff group اختار Medical and Dental، وبعدين هتلاقي قائمة اختار منها vacancies .

2 - من Training Programme 

اختار البرنامج اللي انت عاوزه .

3 - روح على

Include closed vacancies 

واختار yes.

4 - هيطلعلك الاعلانات القديمة بتاعت التخصص، افتحها هتلاقيهم حاطين

Information/Documents/Hyperlinks 

فيها تفاصيل أكتر، وأوقات بيبقى في حاجة اسمها

self scoring sheet 

بيبنلك بالضبط بتاخد كام درجة عن حاجات في ال portfolio .

رابعا ازاي تقدم :

اول حاجة لازم تعرف مواعيد التقديم

كل سنة بيفتحوا معادين للتقديم .. حركة اساسية و حركة تكميلية للوظائف اللى اتبقت من الحركة الاساسية

ده التايم لاين بتاع التقديم بس طبعا المواعيد دي كلها اتلغت بسبب الكورونا .. المهم انت لما تيجي ابقي تابع ع الموقع نشر المواعيد الجديدة

https://specialtytraining.hee.nhs.uk/Recruitment/Recruitment-timelines

التقديم على وظايف التدريب بيتم من خلال موقع الاوريل

https://new.oriel.nhs.uk/Web/Home

اول حاجة لازم تخش تعمل عليه اكونت .. زي ما بتملى برفايل ال NHS JOBs بس تفاصيل اكتر شوية

تابع عليه بقي الاتي

1- نزول اعلانات الوظايف: و دي تعرف فيها التخصص بتاعك نزل و لا لا و متوفر فيه كام مكان و في مدن ايه

2- فتح باب الاستمارة: بتبدأ تملى استمارة التقديم على البرنامج التدريبي اللى انت عايزه

3- الانترفيو: لو الاستمارة بتاعتك اتقبلت بيبلغوك تيجي تحضر انترفيو

4- لو اتقبلت ف الانترفيو بيبعتولك عرض الوظيفة في مكان معين

5- معاد بداية الشغل الجديد اللى حتشتغل فيه بشكل رسمي

بعد ما تقدم على وظيفة ممكن قبل او بعد الانترفيو يقولك املى رغبات زي تنسيق الثانوية العامة كده

حتلاقي الاماكن اللى حتاخد فيها التدريب و ترتبهم حسب رغبتك

خلي بالك احتمال تلاقي نوعين من الوظايف

1) LAT (Locum Appointment for Training)

اللي هي سنة تدريبية واحدة ماينفعش تتجدد وماينفعش تاخد منها أكتر من اتنين على مدار مسارك الوظيفي..

تنفعك لو انت عايز تتدرب سنة او سنتين هنا وبعدها ترجع بلدك تاني.. أو لو مش لاقي وظيفة تدريبية كاملة.. فتاخد دي وتتخصم لك بعد كده من سنين تدريبك اذا لقيت وظيفة تدريبية ..

عموما .. هي وجودها بيقل جدا واحدة واحدة وأتوقع انها تختفي قريب..

2) Complete training program with a National Training Number (NTN)

وده بيكون برنامج تدريبي ينقلك من مستوى للمستوى اللي بعده..

و هو ده اللى احنا بنتكلم عليه من اول البوست

الانترفيو :

طبعا بيبقي اصعب و اطول شوية من الانترفيو بتاع الوظايف الخدمية .. ابقي راجع المكتوب في بوست "ازاي تعدي من الانترفيو" و الكتب اللى في لينكات البوست مفيدة جدا

الحاجات اللى بيقيموها مكتوبة بالتفصيل على في بوست " ازاي تقوي السي في"

طبعا ما ينفعش اونلاين فيديو لازم تحضر بنفسك وجها لوجه

بنية الانترفيو مختلفة حسب التخصص و حسب المستوى الوظيفي

حسب ما شرحلنا احد الزملاء .. كان 4 لجان كل لجنة من 60 درجة

.. كل لجنة من 2 استشاريين.. وأحيانا بيحضر واحد من الرويال كوليدج بس عشان يراقب ويسجل اللي بيحصل

أول لجنة: (وهي أهم لجنة.. ولو ماعديتش فيها.. يستحيل انك تاخد البوست.. مهما أي حد قال لك غير كده)

اللجنة دي تتقسم قسمين:

Evidence & Suitability

and

Commitment

في اللجنة دي حضرتك هتقعد مع اثنين استشاريين ١٥ دقيقة يطلبو منك تعرف نفسك في دقيقتين و بعدها يقعدو يفصصو السي في بتاعتك ويسألوك عن أدلة ويتحدوك في كل نقطة فيها لو الوقت كافي.. الجزء ده بيسموه:

Checking your evidence & suitability

بعد كده يقلبو على ولاءك وانتماءك ودليل حبك وإخلاصك للتخصص 💕

مثلا.. لو دي لجنة إندوكراين..

لو ماعرفتش تثبت لهم انك اشتغلت اندوكراين كتير او حضرت عيادات اندوكراين او عملت أوديت في الاندوكراين او نشرت حالة او بحث في الاندوكراين أو حضرت مؤتمرات وورش عمل في الإندوكراين... ماتتوقعش أبدا انك تاخد الوظيفة مهما عملت في باقي اللجان!

على سبيل المثال.. فيه ناس بتقدم على تريننج في كذا تخصص في الباطنة (تقدم على إندوكراين ورينال وريسب و جاسترو وجيرياتريك وأكيوت.. على أمل ان لو واحد ماجاش.. التاني ييجي) وبيعملو اكتر من انترفيو.. وغالبا بيسقطو بسبب الكوميتمنت لكل سبيشياليتي فيهم..

ماهو مش سهل برضه تثبت في كل انترفيو حبك واهتمامك بالتخصص ده وانك عملت كل حاجة فيه.. في حين انك في الحقيقة مقدم في ألف تخصص تاني..

ثاني لجنة:

Clinical Scenario

and

Communication

هنا اثنين استشاريين تانيين بيقعدو معاك ١٥ دقيقة ويدولك سيناريو ويبدأو يسألوك فيه.. وبعدين يخلوه يتكلكع منك ويسألوك.. ويدوك درجة على معلوماتك الطبية وتصرفك في السيناريو ده..

وفي نفس الوقت هيدوك تقييم تاني على قدرتك في التواصل معاهم -سواء على مستوى اللغة أو قدرات التواصل - أثناء اللجنة.. ومع المريض أو أسرته في السيناريو المفترض..

في الغالب.. قليل أوي اللي بيسقط في اللجنة دي.. إلا لو عملت مصيبة طبية .. أو قدراتك في التواصل ماحصلتش!

ثالث لجنة:

Ethical Scenario

and

Professionalism and Governance

هنا اثنين استشاريين تانيين هيقعدو معاك ١٥ دقيقة كمان ويدولك فيها برضه سيناريو.. بس هيكون فيه مشكلة أخلاقية أو مهنية في السيناريو..

things like: mental capacity assessment.. patient refusing life saving treatment.. an angry relative.. end of life care.. best interest decisions..etc

هنا الدرجات هتكون على حسن تصرفك مع الجانب المهني والأخلاقي.. مش على الجانب الطبي..

يعني مهما اتكلمت في الطب وشخصت وعالجت.. تاخد صفر لو اجاباتك على الجانب المهني أو الأخلاقي كانت غلط..

بعدها هيسألوك سؤالين ثلاثة في البروفيشناليزم.. ودي لها درجة لوحدها..

اللي مهتم يذاكر أو يقرا البروفيشناليزم - وده من أهم أساسيات الطب هنا.. وعدم وجوده هو واحد من أهم أسباب مشاكل الطب في بلادنا- ففيه موجود على ال

GMC website

فيه ملف كامل في منتهى التفصيل اسمه:

Good Medical Practice

الأسئلة مش بتطلع بره عنه... ومشاكل الحياة اللي بتقابلها برضه في الطب.. مش بتطلع بره عنه

اللجنة الرابعة خاصة بالتخصص الدقيق اللى انت مقدم عليه لو st3

بتخلص سيادتك.. وبتروح البيت تستنى النتيجة..

بعد الإنترفيو بكام يوم هتظهر النتيجة على أوريل.. ويتحط لك سكور إجمالي بتاع الإنترفيو..

بناءا على نجاحك أو لا قدر الله رسوبك.. وبناءا على السكور.. تبدأ تتعرض عليك الوظايف حسب رغباتك.. زي التنسيق كده..

وحسب سكورك مايجيب.. يديك الوظيفة اللي تجيلك..

ومن حقك طبعا تقبل أو ترفض أو تستنى لو غيرك رفض حاجة أو...أو...أو...

لو لا قدر الله اترفضت ابدا شوف نقاط ضعفك كانت ايه و اشتغل عليها و قدم في الموسم اللى بعده .. خليك صبور .. و لو نجحت بإذن الله و جالك اوفر الوظيفة راجع بوست "ازاي تغير وظيفتك جوا انجلترا "

خامسا شوية ملاحظات خاصة بالتريننج

- لو انت في برنامج تدريبي ما ينفعش تسيبه بعكس الوظيفة الخدمية .. ولو طردوك منه مش حتعرف تخش في اي برنامج تاني

- وظيفة التريننج مش ضروري تبقي تبع مستشفى معينة زي الوظايف الخدمية .. بتبقي تبع هيئة تعليمية بتدير عدة مستشفيات زي التراست كده .. فغالبا حتلف كل ٦ شهور في مستشفى شكل بس في نفس المنطقة غالبا

- نظام المرتبات ف التريننج مختلف شوية لانه بيعتمد على عدد ساعات العمل .. ممكن مرتبك يقل عن لو كنت شغال في وظيفة خدمية

- مش بتحتاج الابريزال السنوي .. بيتم استبداله بحاجة اسمها

ARCP

- نظريا .. ممكن تيجي انجلترا على تريننج دايركت..لكن عمليا.. ما بتحصلش .. أغلب الناس بتقعد سنة أو أكتر (أحيانا ٥ سنين) عشان تجيب تريننج.. وان كانت الأمور بتسهل كل راوند عن اللي قبله

- كل تخصص له تفاصيل دقيقة خاصة بيه ..انا كلامي هنا مركز على الكاريير الجراحي .. راجع تفاصيل تخصصك و متطلبات التريننج بتاعه من هنا

https://specialtytraining.hee.nhs.uk/Recruitment/Person-specifications