ازاي تسوق في انجلترا

  

كتب : أيمن زيادة 

نشر : محمد حسن

تنبيه يجي عليك مراجعة كافة المعلومات الواردة أعلاه طبقا لأحدث القوانين و الشروط الوارده فى المقال و المقال المنشور مكتوب طبقا لتجربة أو رأى شخصى لا يلزم أحدا و لا يلزم صاحب  المدونة  

مبدأيا للأمانة انا شخصيا مش باسوق في انجلترا لاني مقيم في لندن و لندن في شبكة مواصلات ممتازة جدا تغنيك عن اي عربية و لكن لو انت ساكن في مدينة تانية غالبا حتحتاج عربية و على المدى البعيد بتكون اوفر من استعمال المواصلات

 

المهم ان الكلام في البوست ده هو مش تجربة شخصية هو كلام زملاء و تجميع لبوستات قبل كده

 

أولا ازاي تطلع رخصة

 

في 4 انواع من الرخص ممكن تسوق بيهم

 

1- رخصة القيادة الدولية

 

لو أنت مطلع رخصة القيادة الدولية من مصر ممكن تسوق بيها لمدة سنة واحدة فقط .. على ما تمتحن امتحان الرخصة الإنجليزي وتنجح وتحصل عليها ..

 

2- الرخصة المصرية الجديدة او الخليجية (اللي فيهم البيانات بالإنجليزي)  ..نفس الكلام زي الرخصة الدولية

 

3- الرخصة الانجليزية المبدأية Provisional Driving Licence

 

دي بتقدم عليها أونلاين  https://www.gov.uk/browse/driving/driving-licences

 

 

بيتطلب منك تسجل بياناتك أونلاين وتكتب العناوين الي عشت فيها آخر خمس سنين. وبعدين بيبعتولك جواب على عنوانك فيه فورمة بتملاها وتبعتها مع صورة شخصية بخلفية بيضاء و كارت البي ار بي  أو الباسبور بتاعك للعنوان الي هيدوهولك. خلي بالك بتقعد اسبوعين ولا حاجة بدون البي ار بي او الباسبور.

عند ارسال الطلب و الجواز او ال بي ر بي ابعتهم في اميل مسجل بكلف 6 باوند اطلب ظرفين واحد اطوية حطة مع الطلب داخل الظرف الثاني عشان تضمن انه يرجعوه بالبريد المسجل، لو معرفتش مكاتب البريد عارفين ازاي وراح يساعدوك.

وبتدفع فلوسها أونلاين 34 إسترليني ، وبتوصلك على عنوانك البريدي في خلال أسبوع مع الباسبور او البي ار بي اللى بعته

 

دي فايدتها انها  بتسمحلك تسوق العربية عشان تتعلم مع حد من شركات تعليم السواقة ، أو مع حد زميل يكون معاه Full driving licence

 

ممكن تستعملها كإثبات شخصية كبديل عن الباسبور أحيانًا.

 

انما ما بيديلكش الحق في إنك تسوق لوحدك.

بمجرد ما تطلع رخصة المؤقتة يمنع عليك السواقة بالرخصة الدولية..( فحاول تخلي الفتره بين تقديم الطلب والحصول على الرخصة اقصر فتره ممكنة)

اللينك ده عليه ليسته مدارس السواقة المعتمدة

 

https://www.gov.uk/find-driving-schools-and-lessons.

 يمكن اخذ دروس السواقة على سيارة مدرب تكلفة الساعتين 45 للمانيوال و50 لاوتوماتيك او على سيارتك التكلفةّ تقريبا 40 باوند، تقدر تفاصيل المدرب او شركة السواقة.

 

4- الرخصة الانجليزية الكاملة Full Driving Licence

 

دي بيبقى ليها امتحانين : امتحان نظري ، وامتحان عملي .. بعد ما بتنجح فيهم ، بتاخد الرخصة النهائية وتسوق براحتك في الشوارع.

 

أولا : الامتحان النظري Theory Test

 

ده عبارة عن جزئين :

 

1- امتحان MCQ عبارة عن 50 سؤال عن العربيات والموتوسيكلات ، و100 سؤال عن الباصات والشاحنات وكدة.

 

تقدر تتدرب على الامتحان ده وتذاكره من مصادر مختلفة من على الموقع نفسه ومن على الإنترنت ، وفي برامج على الكمبيوتر والموبايلات بتغطيه كويس. لو نزلت برامج ال DVLA على الموبايل عندك وحليت الأسئلة فيها هتعدي من النظري بسهولة لأن هي هي نفس الأسئلة بالنص. بس عدد كبير طبعًا

 

ده الكتاب النظري بتاع الحكومة

 

https://www.gov.uk/book-theory-test

 

و في مواقع زي دي للتدريب

 

http://toptests.co.uk/

 

https://www.gov.uk/take-practice-theory-test

 

2- Hazard perception test

 

ده عبارة عن مجموعة فيديوهات بتتعرض (14 فيديو) فيهم مشاهد يومية من المرور والعربيات في الشارع ومطلوب منك تطلع المخالفة إيه والحاجة الغلط إيه ..

 

(Spot the Hazard)

 

عشان تنجح فيه لازم تجيب على الأقل 43 من أصل 50 درجة في ال theory test ، وتجيب 44 من أصل 75 في الـ Hazard perception test

 

احجز الامتحان النظري من هنا .. تكلفته 23 باوند

 

https://www.gov.uk/book-theory-test

 

لو ما نجحتش في الامتحان النظري ده تقدر تحجز وتقدم تاني بعد مرور 3 أيام عمل.

 

الامتحان العملي للقيادةDriving Test  وده بتقدم عليه بعد ما تنجح في الامتحان النظري ..

 

بيبقى عبارة عن إنك بتسوق لمدة 40 دقيقة متواصل بدون أخطاء تذكر ، ويتطلب منك تروح مكان معين ، وتركن ، وتطلع من ركنة ، والمسافات بينك وبين العربيات ، ومطلع الشوارع ، وأولوية المرور لمين في الـ round about ، وكل حاجة تخص السواقة ، وبتبقى متراقب طول الامتحان للتقييم ورصد الأخطاء.

 

الموضوع صعب شوية لو انت بتسوق ف مصر و اتعودت على سلوكيات خاطئة في السواقة في مصر .. لكن هو بيبقى أسهل على اللي لسة بيتعلم سواقة جديد من الصفر .

 

المفروض ما تعملش أكتر من 15 خطأ قيادة Minor.. وما تعملش ولا خطأ كبير Major ..

 

و لو ما نجحتش تقدر تحجز تاني وتمتحن تاني بعد مرور 10 أيام عمل من امتحانك الأولاني.

 

بعد ما تنجح الممتحن اللي معاك بيديلك شهادة نجاح في اختبار القيادة وتقدر تسوق مباشرة من اللحظة دي .. ومش لازم تستنى إصدار الرخصة ..والمفروض الرخصة بتتبعت ليك في خلال 3 أسابيع من نجاحك في الامتحان ..

عشان تقصر فترة التدريب خود دروس سواقة قبل ما تنجح بالجزء النظري . انا اخدت درسين قبل النظري و درس بعده ودخلت الإمتحان ونجحت.. المدة كانت بين النظري و العملي 5 ايام عشان اضمن اني ارجع اسوق باسرع وقت

 

اهم حاجة .. انسى خالص طريقة السواقة اللي كنت بتسوق فيها في مصر .. هناك في حارات ومسافات وإشارات في كل مكان .. وهتحس فعلا بمعنى سواقة ومتعتها ..

 

ثانيا تشتري منين العربية

 

 

1- التأجير من المستشفى

 

 كتير من المستشفيات التابعة للـ NHS بيقدموا مزايا للعاملين في المستشفى من ضمنها إنهم يوفرولك عربية تأجرها لمدة محددة مقابل رسوم شهرية بتتخصم من مرتبك ..

 

اسأل على ال Lease cars في المستشفى اللي أنت فيها .. او الnhs fleet

 

الاختيار ده بيبقى مناسب جدا لناس كتير اللي مش عايزين يشتروا عربية في الأول.. وبتبقى الرسوم معقولة ممكن 150 إسترليني وأحيانا بيوصل لـ 500 إسترليني في الشهر على حسب الموديل.. بتدفعهم للمستشفى ، وهي مسؤولة عن الضرائب والصيانات وما إلى ذلك.

مش كل ال trusts مشتركة فيه ... و عادة بتحتاج تكون معاك عقد عمل سنتين علي الاقل او دائم علشان تشترك فيه ( الموضوع بيختلف من مستشفي لمستشفي و علشان كدة اسال اضمن)

ميزتة ان المبلغ الي بتدفعة كل شهر شامل العربية و التامين و الصيانه و بيتاخد من المرتب قبل خصم الضرايب salary sacrifice scheme.... بعد نهايه المدة الي هيا بتكون يا سنتين يا ثلاثة بتحتاج ترجع العربية ليهم او تشتريها منهم مرة واحدة

 

 

 

2- التأجير من شركات السيارات

 

وده طبعا بيبقى مكلف جدا وما ينفعش مع أغلبنا عشان الالتزامات الكتير اللي عندنا.

 

3- شراء عربية جديدة

 

الجديدة هتبقى طبعا أغلى .. هتضطر تجيبها بالتقسيط طبعا .. بس القسط الشهري بيبقى عادة معقول..

 

-عشان تجيب عربية جديدة ، لازم يكون معاك رخصة قيادة إنجليزية كاملة Full Driving Licence

 

 مبلغ التأمين هيبقى عالي جدا ممكن يوصل لـ 5000 إسترليني وبتدفعهم كاش..

 

4- شراء عربية مستعملة من الافراد

 

ممكن تشتري عربية حديثة استعمال نظيف جدا ..

 

وده بيبقى عن طريق الشراء من أفراد عارضين عربياتهم في الشارع أو عارضينه في إعلانات على الفيسبوك أو على مواقع زي :

 

https://www.gumtree.com/

 

http://www.motors.co.uk/

 

http://www.autotrader.co.uk/

 

- ميزة الشراء من أفراد إنها بتبقى أرخص وبيبقى فيها حاجات سعرها لقطة ، إنما عيبها إنها أحيانا ما بتبقاش مفحوصة فا غالبا بيبقى فيها حاجات محتاجة تصليح وصيانة والحاجات دي طبعا تكاليف كتير زيادة عليك.

الفكرة ان في البلد دي تصليح العطل ممكن يبقى أغلى من تمن العربية لانها بتتحسب بعدد ساعات العمل الميكانيكي (معدل ٤٢ باوند في الساعة ) ممكن تشتري عربية ب ٣ الاف و الجير بوكس بتاعها يضرب بعد شهر حتلاقيه يتغير بألفين فحتروح ترمي العربية في ال Scrapyard ... وممكن تدفع عليها فلوس النقل كمان .

 

 

 

5- شراء عربية مستعملة من المعارض

 

ميزة الشراء من المعارض إنها بتبقى مفحوصة ومعمول لها صياناتها ولو في حاجة معينة فيها المعرض بيقوللك عليها بوضوح، لكن عيبها إنها بتبقى أغلى شوية من لو هتشتريها من أفراد.

 

 

 

- لما تشوف العربية اكشف على الكاوتش ميبقاش فيه بلالين او قطع ، ويبقى عمق المداس أكتر من 1.6mm

 

وإلا هيبقى غير قانوني

 

( بتعرفه بمقياس عجل أو بـ Coin p20)

 

- من الحاجات اللي بتعلي سعر العربية : الورق اللي معاها أو ما يسمى بالـ service history.. لو الورق ده كامل بيبقى أحسن عشان بتبقى عارف قصة حياة العربية من الزيرو لحد ما اشتريتها.

 

- لما تشتري عربية مستعملة اتأكد إن كل حاجة شغالة. يعني كل اللمبات سليمة و المساحات مش مقطوعة و بتمسح الزجاج كويس أمامي وخلفي ، والرشاشات شغالة و الكلاكس و أحزمة الأمان ، لإن لو حاجة بايظة لازم تغيرها قبل الفحص ومش هينفع تمشي بيها كده .. لازم تبقى العربية working 100%

 

وإلا لازم تفاصل معاه وتنزل من تمنها ..

 

- لما تشتري العربية هتاخد من المالك القديم ورق ترخيص العربية القديم و الصيانات .. و مفتاحين .. بلاش مفتاح واحد عشان لو ضاع هتحتاس و تكلفة نسخ المفاتيح دي غالية.

 

ثالثا تأمين العربية

 

عشان تسوق هتحتاج :

 

رخصة قيادة /MOT / تأمين / ضريبة

 

لو العربية جاية معاها شهادة MOT سارية (حنتكلم عنها تحت شوية)، كل اللي محتاجه تدخل على النت تدفع الضريبة و تختار التأمين وتدفعه.. و بكدة تقدر تسوق في نفس اليوم.

 

- في حاجة اختيارية ممكن تعملها.. في حاجة اسمها Breakdown coverage

 

وده عبارة عن تأمين على الأعطال .. بمعنى إنك لو عطلت في أي حتة لأي سبب بيجيلك لحد عندك ميكانيكي يصلح العربية ، ولو معرفش يصلحها بينقلوا العربية لأقرب مركز تصليح وممكن يوصلوك مشوارك كمان. وأشهر شركتين بيقدموا الخدمة دي :

 

- شركة AA

 

http://www.theaa.com/breakdown

 

- شركة RAC

 

https://www.rac.co.uk/breakdown-cover

 

الأسعار بتختلف على حسب الموديل وحالة العربية.. في عربيات ممكن تبدأ من 250 جنيه وأنت طالع لحد آلاف الجنيهات الإسترليني..

 

بخلاف البنزين والصيانات ، في ضريبة بتدفعها على العربية ، ودي بتتحدد على حسب الانبعاثات اللي طالعة من العربية ومدى تلويثها للبيئة.. ممكن عربيات ما يبقاش عليها ضريبة ، وممكن عربيات توصل ضريبتها لـ 120 إسترليني في السنة.

 

كل العربيات لازم يكون متأمن عليها .. التأمين ده ممكن يكون :

 

- تأمين شامل - Comprehensive

 

- تأمين على ممتلكات الغير – Third Party

 

- تأمين ضد السرقة والحريق - Fire and Theft

 

ممكن تعرف قيمة التأمين من خلال رقم لوحة العربية .. بتدخله على الإنترنت على موقع زي:

 

https://www.confused.com/

 

https://www.comparethemarket.com/

 

وتشوف عروض شركات التأمين عشان تعرف متوسط سعر التأمين اللي هتدفعه في السنة.

 

شوية نصايح بخصوص التامين

 

·       على الجميع ان ياخد تامين شامل Comprehensive أرخص و افضل

·       افحص قيمة التامين قبل شراء العربية لان في نوعيات بكون تأمينهم غالي

·       عند مقارنة التأمين حاول اتغير وظيفتك و اتشوف الوظيفة يلي أرخص( ازاي؟؟) مثلا طبيب التخدير تامين العربية بتعته اغلى من طبيب الNHS يلي هو اغلى من طبيب الطوارئ... انا طبيب تخدير ولما قدمت سجلت اني طبيب NHS وبكدة بكون ما كذبتش و وفرت 300 باوند، نعم 300 باوند عشان قلت اني طبيب NHS و لم احدد تخصصي

·       لا تختار موضوع البلاك بوكس لانك حتدفع فلوس عند تركيبة و عند ازالتة المبلغ حوالي 100باوند

·       بعد ما تحدد شركة التامين كلمهم واتاكد انك لو غيرت مكان سكنك او ضفت زوجتك مش حياخدوا رسوم 50 باوند اضافي و في نفس الوقت اطلب انه يعمل اعادة تقيم لملفك وانت على التلفون و يمكن توفر كمان كمان 200ّباوند

·       في جزء بالتأمين بسألك انت عاوز اتشارك في تكاليف التصليح لو اعلمت حادث اكتب نعم و اختار مبلغ 250 باوند او 100 باوند و شوف مين فيهم  يقللك قيمة التأمين، لا تكتب صفر باوند..

 

 

رابعا ال MOT

 

اى عربية الموديل بتاعها فوق ال 3 سنين بتحتاج ما يسمى باختبار الـ MOT (Ministry of Transport)

 

وده زي الفحص الفني للعربية عندنا ، بيشمل كشف على حاجات الأمن و السلامة و حالة الموتور والانبعاثات منه وهكذا ، وبيتعمل سنويا.. تكلفته حوالي 50 إسترليني ، ولو العربية عدت الاختبارات بتاخد شهادة الـ MOT دي ..

 

ولو معدتش هتضطر تعمل كل الإصلاحات اللازمة عشان يبقى مصرح ليك تمشي بيها .. بس مش هتاخد الشهادة الا لو العربية عدت الاختبارات ..

 

لو مش معاك الشهادة دي وتاريخها ساري، حضرتك معرض لغرامة تصل لـ 1000 جنيه ، وممكن العقوبة توصل للحبس.

 

 يستحسن تشتري عربية موديل ميزيدش عن 10 سنين و وماشية أميال مش أكتر من 80.000 ميل ، ومعاها MOT صالح على الأقل لمدة 6 شهور ، عشان تركبها وتسوقها على طول بدون مشاكل .

 

وتقدر تعرف فاضل للعربية صلاحية كام شهر في ال MOT وتعرف عداد الأميال الأصلي بتاعها عامل كام ، وكام مالك اشتراها قبل منك ، ولو في أي نصايح للإصلاحات المطلوبة ، وبكدة صعب حد يضحك على حد لأن كله مكشوف وممكن تعرفه بنفسك قبل ما تشترى.

 

الكلام ده كله تقدر تعرفه من على موقع الحكومة من اللينك ده

 

https://www.gov.uk/check-mot-status

 

خامسا الصيانة و الاعطال

 

في حالة الاعطال في شركات تصليح كتير في رايي افضل و ارخص اسمها green flag. انا بصراحة اخد عقد من الشركة اللى اشتريت منها العربية لمدة سنتين و بعدها اعمل عقد عن طريق شركة التأمين بكون افضل و ارخص من انك تاخد عقد من شركات التصليح لو حدك.. وفي حاجة مهمة انه تتأكد انهم حيساعدوك لو العربية عطلت باب البيت. اغلب العقود بتكون الحتة دي ملغية و اكثر الناس سياراتهم بتتعطل باب البيت... و بلاش تطلب انهم يغطوا الاعطال في البلاد الاروبية لانة يا عالم امتا حتسوق في دول الاتحاد الأوروبي وده برفع قيمة عقد التصليح

 

 

Break down cover

بالقانون لو العربية عطلت على طريق سريع ..لازم كل الركاب ينزلوا و يقفوا في حتة أمان بعيد عن العربية او ورا سور لحد لما تجيلهم المساعدة ...

مش مسموح لك قانونا تقوم بأي محاولة إصلاح على الطريق السريع و إلا تبقى مسؤول عن الخسائر في الأرواح أو الخسائر المادية...

في كتاب ال Highway code 

بيطلب من كل سواق يبقى معاه احتياطي جاكيتات لكل الركاب و شمسية للمواقف دي ..وعلى الطرق السريعة في تليفون أحمر مجاني كل ميل لإجراء المكالمة مع الشركة لو مافيش موبايل متوفر ...وبين كل تليفون و التاني في عمدان صغيرة على الأرض كل ١٠٠ متر عليها سهم لاتجاه أقرب تليفون و عليه إحداثيات المكان ده لو عايز تديها للشركة عشان يعرفوا يوصلولك (لو ماعندكش موبايل فيه مابس ).

لو انت مش مشترك مع شركة من قبل كدة حتدفع من ١٦٠-٢٥٠ باوند في المرة الواحدة لما تكلمهم و يجولك عشان ينقلوا العربية ...

لو انت مشترك حيجولك و يصلحوا المشكلة او ينقلوا العربية ببلاش للجراج اللي انت عايزه ..

تكلفة الاشتراك السنوي في معظم الشركات بتبقى من ٢٥ -٥٠ باوند ...

ممكن تجيب العروض من على مواقع البحث عن تأمين العربيات زي

Go compare , moneysupermarket ..etc

 

بعض النصائح للحفاظ على العربية في فترة الشتا

 

https://www.confused.com/on-the-road/maintenance/prepare-your-car-for-winter-maintenance-tips

 

 

 

سادسا ازاي تختار عربية

شوية نصايح عامة بخصوص الشرا من تجارب الزملاء

·       انصح الكل يشتري عربية من وكيل بلاش من برايفت على الاقل في اول عربية

·       العربيات البنزين يكون عمرها اقل من 9 سنوات و تكون ماشية اقل من 80000 ميل. لو العربية سولار تكون بعد سنة 2015 لان لو قبل كدة بتخسر كثير عند البيع و بتكلف اكثير لو مشيت فيها في مناطق ال كونجششن زون تبعت لندن و برمنجهام و ليدز.

·       بلاش العربيات البريطانية لانها مش قد كدة

·       السعة اللترية : البنزين هنا غالى جدا عشان كده متفكرش فى العربيات الكبيرة

·       ديزل او بنزبن: مش هتفرق كتير

·       اوتوماتيك ولا مانيوال :على حسب اللى انت متعود عليه

·       اتأكد من المكان اللى هتحط فيه العربية عند بيتك وعند المستشفى ...ده من اهم الحاجات اللى تاخد بالك منها لان الباركينج هنا مش سهل و مكلف شوية