ازاي تصبر على طول الطريق

كتب : أيمن زيادة 

نشر : محمد حسن

تنبيه يجي عليك مراجعة كافة المعلومات الواردة أعلاه طبقا لأحدث القوانين و الشروط الوارده فى المقال و المقال المنشور مكتوب طبقا لتجربة أو رأى شخصى لا يلزم أحدا و لا يلزم صاحب  المدونة  

***مواصلة السعي تقتضي حتمية الوصول***

الكلام المرة دي  مفهوش تفاصيل معقدة و خطوات و شروط و تعليمات الخ .. المرة دي الكلام عام جدا و اظن حيفرق مع ناس كتير جدا على المستوى المعنوي

سواء انت ماشي في بلاب او امتحانات عضوية كلية ملكية او بتخلص ترخيص الجي ام سي او بتدور على وظيفة او بتجهز نفسك للسفر .. فالسكة طويلة شوية و متعبة و محتاجة صبر و جهد

البوست ده انا حاتكلم فيه على أسباب في الحياة في انجلترا تساعدك تصبر على طول الطريق .. الكلام ده مش حقائق مجرده هو في حاجات كتير تعتبر تجارب شخصية .. اعتبروها مساحة فضفضة او سرد خواطر

بالمناسبة ححاول اتجنب الكلام عن العيوب و المشاكل عندنا في مصر لانها معروفة للكل .. انا باركز هنا علي مميزات الحياة في انجلترا

أولا الجنسية

من أكبر مميزات سكة انجلترا و حتاخدها سواء دخلت برنامج تدريبي او ما دخلتش .. المطلوب فقط انك تكون اشتغلت في انجلترا 6 سنين متواصل مفهمش انقطاع طويل و انك تعدي امتحان الجنسية و هو امتحان عن تاريخ و جغرافيا و قيم البلد

https://www.gov.uk/life-in-the-uk-test

بمجرد حصولك على الجنسية حتتمتع بكافة حقوق المواطن الانجليزي .. زي التصويت في الانتخابات و المشاركة السياسية و تملك الاراضي و بتقدر تعمل اقامة لوالدك او والدتك جوا البلد.. بتقدر تدخل و تخرج من البلد بحرية في اي وقت لاي فترة

الباسبور الانجليزي يدخلك 113 دولة بدون تاشيرة شاملين امريكا و الاتحاد الاوروبي ويدخلك 41 دولة بتاشيرة بتاخدها ف المطار عند الوصول .. حرفيا 90% من العالم تقريبا

https://www.passportindex.org/comparebyPassport.php?p1=uk&fl=&s=yes

و بالمناسبة انت حرفيا في قلب اوروبا.. لو طلعت فيزا شنجن سهل تاخد قطر من لندن لباريس ف ساعتين تقضي يوم و ترجع اخر النهار .. و في رحلات طيران للمدن الاوروبية كلها باسعار رخيصة جدا .. ليا صديق كان حاجز طيران لسكتهولم ب 8 باوند ! .. الل هو حرفيا تمن رحلة الطيران ارخص من تمن اوبر اللى حيوصله المطار

ثانيا التقدم الطبي

بريطانيا هي موطن ميلاد الطب الحديث .. أينعم كان بدافع استعماري و لكن تطور الطب من خرافات العصور الوسطى للمنهجية العلمية تم في بريطانيا و بالتالي هي من أكتر دول العالم تقدما في مجال الطب و أكثرها ثراءا و إضافة في البحث العلمي.. حتشوف هنا الاختراعات اللى كنا بنسمع عنها في مصر و العمليات النادرة جدا و احدث التكنولوجيا في كل مجالات التخصص .. زراعة الخلايا الجذعية .. الجراحة بالروبوت .. تقنيات النانوتكنولوجي .. الكلام ده موجود في معظم المستشفيات الكبيرة مش حاجة نادرة او غريبة .. تخيل اعقد حاجة و احدث حاجة و اغلى حاجة في مجال تخصصك حتلاقيها موجودة و بتتعمل عادي في مستشفيات انجلترا.. انا شخصيا شفت وسائل علاجية مكنتش اسمع عنها اصلا في مجال تخصصي في مصر مع اني كنت باقرا فيه كتير

الشغل في انجلترا حيغير مفهومك عن الطب كممارسة و كفلسفة و كطريقة تفكير

ثالثا التقدم العلمي

مش عايز اقول المقدمة التقليدية السخيفة ان انجلترا متقدمة علميا جدا و بتحترم العلماء وانجبت عظماء كتير زي جراهام بل و فلمنج و نيوتن و داروين و ستيفن هوكينج و غيرهم .. لكن حاتكلم على المستوى الشخصي البحت

من المناظر اللى أصبحت مألوفة ليا في شوارع في لندن منظر عربية تسلا و هي واقفة بتشحن في فيشة كهربا بخرطوم خضم طالع من الكبود..

ما زالت فاكر مرة كنت بحضر تدريب في الاي تي بتاع المستشفى .. فتحت الكمبيوتر لقيت الدرايف مكتوب تحتيه

Drive C: 530 GB free of 11.2 TB

سالت على سرعة النت عندهم طلعت 128 ميجا في الثانية بتقنية ال5G و الفايبر جلاس

معظم التعاملات المالية ببطاقات الفيزا الكونتاكتلس .. معظم الناس مش بتمشي بفلوس كاش

تقنيات الفيرشوال ريالتي و السمارت هوم و الثري دي هولوجرام موجودة في معظم الاماكن و البيوت

البوتاجاز في سكن المستشفى اندكشن هوب بتاتش سكرين .. انا عانيت فترة طويلة عشان كنت مش عارف بيشتغل ازاي

معظم الخدمات بتعملها اونلاين

الأوتوبيس الاحمر ابو دورين بيبقي في لسان بيطلع لبرا عشان يعمل زي زوحليقة لركوب و نزول الناس اللى بكراسي متحركة او معاهم عربية اطفال

في مطاعم زي كنتاكي و ستار بكس و غيرهم انت بتحجز الاوردر بتاعك من شاشة الكترونية في المحل او من ابليكشن المحل و تروح تستلم الوجبة على طول ..

لو قعدت اتكلم عن مظاهر التقدم و التكنولوجيا في انجلترا مش حاخلص

رابعا العدل و الامان

القاعدة في انجلترا انك مصدق الى ان يثبت العكس .. صعب حد يتهمك بالكذب او التحايل

الجريمة او السرقات في انجلترا نادرة جدا لانها شبه مش عملية .. لو قررت تسرق حاجة 90% حتتجاب لان كاميرات المراقبة في كل الشوارع و لو ما اتجابتش 90% مش حتعرف تستفيد باللى انت سرقته و مش حتعرف تبيعه او تستخدمه

العادي في انجلترا ان الناس ممكن تسيب بيوتها مفتوحة عادي من غير قفل .. محدش متوقع ان حد يهجم ع البيت او يسرقه .. باشوف كتير ناس بتنزل من العربيات و سايبين المفتاح في الكونتاكت عادي .. مش متوقع ان حد يجروء على السرقة

متفهمش من كلامي اني باقولك خليك مستهتر و لا ان البلد يوتوبيا محدش فيها بيرتكب جرائم و لكن باتكلم ان معدل حدوث حاجات زي كده قليل جدا .. على الاقل من خلال تجربتي الشخصية و الاماكن اللى عشت فيها هنا

شوف البوست ده مثلا بيروي قصة زميل تعرض لسرقة موبايل

https://www.facebook.com/mohammed.e.farag/posts/10157424744607684

انت معاك اقامة بيتم التعامل معاك زيك زي اي بريطاني لك حقوق وعليك واجبات وكلكم امام القضاء سواء حقوق العمل واحده مفيش حاجه اسمها انت اجنبي وده بريطاني الفرق الوحيد هو فقط التصويت على الانتخابات

.

لا وجود للطبقية الوظيفية كما هو الحال في مصر..ممكن تلاقي دكتور جونيور أكبر سننا من الأخصائي و الكل بما فيهم الفنيين والتمريض ورئيس القسم ينادوا بعضهم دون ألقاب في الاغلب

خامسا سمات الشعب الانجليزي

الانجليزي زي اي شعب فيه الكويس و الوحش بس ليهم بعض السمات الخاصة بيهم

اول حاجة حتستغربها لما تيجي هنا الابتسامة .. كل الناس بتبتسم في وشك بشكل تلقائي و دي من الصفات اللطيفة جدا .. مؤدبين جدا في كلامهم .. كلمة ثانك يو بتسمعها ف اليوم عشروميت مرة .. الكلام بصوت منخفض .. مفيش دوشة في الاماكن العامة .. متعودين على ايتيكيت القصور الملكية

الصفة المشهورين بيها عالميا البرود الانجليزي.. هو مش شتيمة او صفة سلبية زي ما معروف عندنا في مصر بالعكس دي صفة تنم على الثقة و هدوء الأعصاب و التماسك عند وقوع المصائب و الاهتمام بالعادات و التقاليد و مش مقصودب يها مطلقا نقص العاطفة أو الرحمة

الانجليز شعب متحفظ جدا بيعشق العادات و التقاليد و التراث .. محافظ.. حتى الستات في لبسهم في الشوارع مش خليع او فاضح زي الفرنسيين و الطليان مثلا

النظام شئ مقدس عند الانجليز .. هما اللى اخترعوا الروتين و البيروقراطية..

الانجليز رغايين بيحبوا الكلام الكتير والحكي في اي مواضيع ( الكورة و السفر و الأكل و النميمة )

بريطانيا مش انجليز بس .. التنوع التنوع الثقافي و الحضاري لمختلف الجنسيات موجود

امبارح انا كطبيب مصري كنت باشتري قهوة امريكية و حلوى بلجيكية في كافيه ايطالي بيذيع اغنية فرنسية بيقدمهالي عاملة ذات ملامح اسيوية و كل ده في العاصمة الانجليزية .. خليط مذهل من العولمة

و من مميزات ده الاكل

الانجليز بيحبوا جدا الكسكس المغربي و الفراخ التيكا ماسالا الهندي و الفلافل المصري و النودلز الصيني و البيتزا الإيطالي و الهوت دوج الأمريكي .. تقريبا مش بيحبوا حاجة من المطبخ الانجليزي غير المخبوزات

بس اللى متاكد منه انهم بيحبوا الاكل جدا .. مفيش ركن في اي حتة ف البلد غير ما تلاقي فيها محل بيبع اكل .. و على الرغم من تعدد اشكال و انواع الفسح ف المدينة .. خروجاتهم اغلبها بتكون في المطاعم او بتدور حوالين محور مكان الاكل الاساسي

و ممكن التنوع الرهيب الثقافي و الحضاري لسكان المدينة بيعكس تنوع في اشكال المطابخ و انواع الاكلات .. لدرجة ان في مقولة شائعة بتقول انك لو قضيت حياتك كل يوم تجرب تاكل في 3 مطاعم مختلفة في لندن حتحتاج 100 سنة عشان تكتشف كل المطاعم الموجودة فيها

سادسا احترام الاطباء

مكانة الاطباء مرتفعة جدا في المجتمع البريطاني و يمكن ده ظهر بوضوح جدا خلال ازمة الكورونا

على المستوى المعنوي لافتات شكر العاملين في الان اتش اس في كل حتة و الناس بتقف كل اسبوع الساعة 8 تصقف في الشبابيك للتعبير عن الامتنان للاطباء و جهدهم

https://www.youtube.com/watch?v=Q3KqxO9oZYw&feature=share&fbclid=IwAR1tMFwhYADGx3sK8ox0vgmlgfNjCLSaFQC2IUH1FiCjFHw3lbdd6C4y59I

و على المستوى المادي كمية ضخمة جدا من التبرعات و العروض و الخصومات اتقدمت لينا .. الاهتمام بوسائل الوقاية الشخصية لدرجة انها توفرها اتحط من ضمن ال 5 شروط في خطة الحكومة لتخفيف الحظر و اولوية الاطباء في الحصول على اختبار البي سي ار في وقت ما كان مش متوفر بسهولة

على سبيل المثال استراحه رجال الاعمال من مطار هيثرو تطوعت انها تقدملنا ف المستشفى مجانا كل خدماتها مع ضيافة مضيفات طيران الخطوط البريطانية بكل ملحقاتها ..الاكل و الشرب و الكنب الفاخر و الشاشة الفور كيه و حتى السليبنج بودز

سابعا المجتمع الإسلامي

الاسلام يعتبر ثاني اكبر ديانة بعد المسيحية و يقدر عدد المسلمين ب 2ونص مليون في تعداد 2011

جدير بالذكر ان الملحدين في المملكة المتحدة في المركز الثاني بالتالي الإسلام هيكون في المركز الثالث من حيث الاعتقاد

٧٨٪؜ من المسلمين في بريطانيا يحملوا الجنسية البريطانية و ٦٣٪؜ ولدوا خارج بريطانيا

المساجد منتشرة جدا في انجلترا خصوصا في المدن الكبيرة و المدن اللى فيها جاليات اسلامية معتبرة و ليها مساحات كبيرة جدا من الحرية و الانشطة مش موجودة في مصر .. المساجد في الغرب عموما مختلفة كتير عن بلادنا ..المساجد هنا مش فقط دور عبادة للصلاة و لكن مجتمع متكامل التفاصيل، من عبادة وعمل وحياة اجتماعية ودراسية و دور للعلم الشرعي والدنيوي ومنتديات ثقافية، وملتقيات اجتماعية ودور قضاء وحتى قاعات أفراح يعقد فيها القِران. هي الملاذ الآمن للعائلات المسلمة من كل الحضارات.

و في مدينة متعددة الجنسيات زي لندن المساجد الكبرى فيها تشبه إلى حد ما الحرمين الشريفين في اجتماع مسلمين من مختلف الأقطار والأعراق والأجناس والطبقات في مشهد جميل جدا العربي و التركي و البنغالي و الهندي و المالاوي و الافريقي و الاوروبي .. كل الاختلافات دي بتدوب في تجانس رائع مع اقامة الصلاة

المسلمين في انجلترا بيمثلوا شريحة كبيرة من المجتمع و الدولة بكل دراعاتها بتهتم باوضاعهم زي كل الشرايح .. رمضان اللى فات كان اول رمضان ليا في انجلترا .. شفت رسالة جاتلنا من من إدارة المستشفى لكل العاملين في المستشفى بتكلمهم عن رمضان

بتشرحلهم يعني ايه رمضان و صيام اهميته بالنسبة للمسلمين و الطقوس بتاعته و كلام عن ليلة القدر و عيدالفطر و التراويح

لكن اللطيف يعني ان في ارشادات بتكلمهم انهم لازم يتفهموا ان زملائهم المسلمين في العمل قد يكونوا صايمين و ده معناه انهم حيمتنعوا عن الاكل و الشرب و التدخين و امور اخرى لفترة طويلة اثناء النهار و ده ممكن يخليهم في حالة ارهاق و تعب اكتر من الوضع العادي خصوصا في الصيف و انهم ممكن يكونوا محتاجين ياخدوا استراحة في اوقات معينة للأكل او الصلاة او انهم ياخدوا اجازة في ايام معينة و لازم كلنا يبقي عندنا المرونة الكافية لتفهم ده و تقبل الوضع المختلف بالنسبة لهم الفترة الجاية

و بالنسبة للمسلمين بتنصحهم بالتزام التباعد الاجتماعي في مسجد المستشفى الى حيفضل مفتوح 24 ساعة و اهمية الشرب بقدر كبير خلال فترة الليل و قبل الفجر لتجنب الجفاف و لو حسوا باي مشكلة اثناء العمل من الصيام لازم يبلغوا مديرهم على طول عشان يتخذ الاجراءات اللى ممكن تساعدهم و انهم يسجلوا اسمهم عند مطعم المستشفى مع جدول الشيفتات المسائية عشان يوفرلهم وجبات ساخنة في وقت الفطار لو مضطرين يكونوا متواجدين في المستشفى و اخيرا يتنصح اي حد يظهر عليه اعراض الكورونا انه يفطر بعد استشاره إمام مسجد المستشفى أو المرجعية الدينية الخاصة بيه

https://people.nhs.uk/guides/covid-19-and-ramadan/

https://www.youtube.com/watch?v=Qv6zPTg40-A&fbclid=IwAR2KkCc9lLamXLtHTccVX7Wb7s8j0EOcx6A8fkNp9_1MKQrgSR7toLM6wB0

و حتى في صباح عيد الفطر لقيت رسالة من المستشفى بتقول:

قد تعجز ذراعيك أن تصل لأقرب الناس إلى قلبك و لكن دعائك لن يعجز أن يعانقهم.. نأمل أن تمتلئ حياتك بهجة و سعادة و قلبك سلاما و أمنا

عيد مبارك لك و أسرتك

كلمات لطيفة مع إعتذار عميق على قرار إلغاء الاحتفال السنوي التقليدي بعيد الفطر في المستشفى بسبب جائحة الكورونا مع محاولة صغيرة لتعويض ذلك بتوزيع الكاب كيك و الحلوى على العاملين بالمستشفى

في بعض الأحياء في لندن ممكن تمشي في الشارع تحس انك في دولة عربية .. كل اليفط بالعربي و الناس كلها بتتكلم عربي زي شارع شارع ادجوار مثلا ..

في المدن الكبيرة المدارس الخاصة الإسلامية متوفرة .. الاكل الحلال متوفر جدا .. المحجبات و المنقبات بيمشوا في الشوارع عادي في كل مكان

بمناسبة النقاب .. الطبيبات المنتقبات هنا بيقلعوا النقاب خلال العمل وبيلبسوا حجاب عادي و بعد الشغل بيلبسوا النقاب ف الشارع عادي

مظاهر العنصرية نادرة جدا ودي من الجرايم المكروهة جدا مجتمعيا و مفيش تسامح معاها باي شكل

بالنسبة لتربية الاولاد للأمانة كتير من أبناء العرب اللى بيتربوا في انجلترا تمسكهم بالدين بيبقي ضعيف .. لكن للامانة برضه ده سبب الرئيسي ان الاهالي مش بتربي

لو الاب و الام بيشتغلوا و مش بيخصصوا وقت و جهد محترم لتربية الابناء بتكون النتيجة سيئة جدا

و على النقيض الاكثر شيوعا في الجاليات الباكستانية و الهندية ابناءهم ما شاء الله اكثر تمسكا بالدين بكتير من العرب لانهم بيهتموا بالتربية جدا

و اظن قضية التربية دي ملهاش دعوة بانجلترا .. انت لو مش مهتم بتربية ابنك و عايش في مكة حيطلع منحرف عادي برضه و ان كان طبعا المغريات في الغرب اكتر فمحتاج جهد اكبر.

ثامنا الجمال

انجلترا بلد جميلة جدا الحقيقة

المناظر الطبيعية و المساحات الخضرا في كل حتة جوا المدن ..و برا المدن طبيعة خلابة و جبال و غابات و ينابيع و شواطئ و كل اللى تتخيله .. و حتى المباني نفسها لا تشبه باي حال الكتل الخرسانية الكئيبة في بلادنا .. المباني تحف معمارية و تناسق الوان و شكل مريح للعين .. و جوا المباني في كل حتى اللوحات و التحف و التماثيل

عينيك حتتعود على الجمال في كل تفصيلة

https://www.youtube.com/watch?v=crEvCn5U8Iw

و بالمناسبة بخصوص الطقس برضه .. انا من اسكندرية و عايش في لندن دلوقتي .. الطقس في لندن حر في الصيف اكتر من اسكندرية و برد في الشتا اكتر من اسكندرية .. و الجو متقلب جدا و ممكن تشتي في اي فصل .. بس المطر في الاغلب خفيف مش بيضايقني .. مش زي النوات بتاعت اسكندرية خالص

انا شخصيا بافضل الشتا عن الصيف سواء ف اسكندرية او في لندن

و مفيش جليد بينزل ف الشتا في لندن الا فيما ندر مرة او مرتين ف السنة مثلا .. السنة اللى فاتت ما نزلش خالص .. او انا شخصيا مشفتش

تاسعا الاحسان

بدون رغي كتير حاكتفي بالكلام عن 3 يفط لطيفة شفتها في المستشفى في بداية شغلي بدون تعليق عليها

الأولى يافطة على تروللي عمليات مكتوب عليها

"تروللي تابع لقسم جراحة الأطفال"

و المفروض ان ده طبيعي و لكن المش طبيعي ان اللى نايم ع التروللي و العمال بينقلوه راجل بالغ لابس جاون عمليات و نايم في حضنه على نفس التروللي طفل صغير لابس جاون عمليات هو كمان

فسالت الممرضة هو ليه ال2 مع بعض على نفس التروللي؟ قالت ان الطفل هو المريض اللى حيعمل العملية و لكن عشان ما يخافش دخلوا معاه أبوه العمليات .. و فعلا فضل الأب حاضن الطفل و بيلاعبه لغاية ما اخد البنج و بعدين اتنقل على تروللي تاني

من الواضح ان ده امر معتاد بما ان قسم جراحة الاطفال يملك تروللي للبالغين مش استعاره من مكان تاني

التانية

مش يافطة و لكن شاشة ديجيتال على الحيطة بيتحط على جدول محاضرات اليوم في مدرج من مدرجات كلية الطب في المستشفى .. مكتوب فيها الآتي

من 8 ص ل 10ص : محاضرة قسم الأخلاق الطبية - العنوان (خصوصية و سرية المريض)

من 10ونص ص ل 11ص ونص: فقرة ترفيهية فنية - العنوان (مسرحية : امتحان في الكريسماس)

من 1ظ ل 3 ظ : محاضرة قسم التواصل - العنوان ( مقدمة في فن التواصل مع المريض)

من 3ونص ل 4 ونص: محاضرة اختيارية مفتوحة الحضور للجميع - العنوان (كيف تنقذ قيادة الدراجات النظام الصحي في بريطانيا )

التالتة

يافطة في حديقة المستشفى جنب بحيرة صغيرة مكتوب عليها

"برجاء عدم إطعام الأسماك في البحيرة لأنها تحصل على نظام غذائي مخصص أوصى به خبير تغذية الأسماك للتمكن من الاحتفاظ بصحة جيدة"

أخيرا طبعا انجلترا مش جنة بمفهوم النعيم المطلق دون مُنغِّصات لان دي حاجة مش موجودة ف الدنيا اصلا و لكن فيه عيوب تقدر تستحملها و تتكيف معاها و عيوب لا تطاق ..

بعض هذه العيوب نسبي، يختلف من شخص لآخر، ويختلف حسب مكان إقامتك في المملكة المتحدة. وهناك عيوب ثابتة على الجميع، كتغيير المقام والبعد عن الأهل.

بس على الاقل مشاكلك مع عيان الجراحة اللى كانت عدم وجود سرير عناية و التحاليل المضروبة و المستلزمات الناقصة و اهل العيان البلطجية حتتحول لمشكلة ازاي نعمل العملية من غير ما جرح العملية يبوظ رسمة التاتو بتاعته

أتمنى تكون السلسلة دي مفيدة لحضراتكم

نسألكم الدعاء ..

 

 

تغرَّبْ عن الأوطان في طلب العلى وسافر ففي الأسفار خمس فوائد

تَفَرُّج همٍّ، واكتساب معيشة وعلم، وآداب، وصحبة ماجد

فإن قـيل في الأسفار ذُلٌّ ومحنة وقطع الفيافي وارتكاب الشدائد

فموت الفتى خير له من قيامه بدار هوان بين واشٍ وحـاسد