ازاي تطلع فيزا العمل .. الجزء الأول ملئ الاستمارة

ازاي تطلع فيزا العمل .. الجزء الأول ملئ الاستمارة

كتب أيمن زيادة 
نشر محمد حسن 

تنبيه يجي عليك مراجعة كافة المعلومات الواردة أعلاه طبقا لأحدث القوانين و الشروط الوارده فى المقال و المقال المنشور مكتوب طبقا لتجربة أو رأى شخصى لا يلزم أحدا و لا يلزم صاحب  المدونة بضم الياء  

الحصول على الفيزا يتكون من 5 خطوات 

1)

 ملئ استمارة التقديم على الفيزا

2) 

تجهيز الورق المطلوب 

3) 

حجز معاد للحضورفي مقر شركة ال TLS لتقديم الباسبور و الورق و رفع البصمات و التصوير 

4) 

الحضور في شركة ال TLS

5) استلام الباسبور 

قبل ما نبدا ف الخطوات .. عايز اقول كام حاجة الاول 

اول حاجة 

موضوع استمارة التقديم بتاعت الفيزا دي غلسة جدا و بتاخد كذا يوم تملاها .. لو انت بتملاها لوحدك لاول مرة و معكش حد عنده فكرة عنها بيبقي الموضوع صعب جدا لان غالبا بتواجهك اسئلة غريبة انت مش عارف تعمل معاها ايه .. عشان كده ححاول اوضح بالتفصيل اللى اقدر عليه كل خطوة في البوست ده 

تاني حاجة

اهم قاعدة في ملي الاستمارة الصدق و الدقة .. ما تكتبش حاجة غلط و الا حتعرض نفسك ان ممكن الفيزا تترفض.. و المصاريف اللى انت بتدفعها في التقديم على الفيزا حتضيع عليك لو لا قدر الله الفيزا اترفضت و كمان احتمال الوظيفة تروح عليك.. فركز جدا و انت بتدخل بياناتك 

تالت حاجة

لازم تعرف ان الكلام بتاع الاجراءات ده ده بيتغير كل شوية لان القوانين بتتعدل .. انا حاتكلم عن تجربتي الشخصية .. بس لازم تتابع المواقع الرسمية بتاعت الحكومة لان وارد يكون حصل تغييرات في بعض التفاصيل او وارد يحصل تغييرات بعد ازمة الكورونا برضه في نظام التقديم .. وارد جدا و انت بتملى الاستمارة تلاقي حاجات مختلفة عن اللى ف البوست ده .. على سبيل المثال على ايامي كانوا بيطلبوا حاجة اسمها "الناريك" و دي شهادة تثبت ان دراستك كانت باللغة الانجليزية .. الطلب ده اتلغى حاليا .. مؤخرا بنسمع كلام انهم حيعملوا حاجة اسمها NHS فيزا .. لسه معرفش اي حاجة عن تفاصيلها .. انا باتكلم هنا على التير-2 جنرال العادية .. في قانون معروض على البرلمان بيناقش نظام جديد للهجرة معتمد على النقاط زي نظام كندا كده .. وقت كتابة السطور دي القانون ده لسه ما اتوافقش عليه .. سمعنا خبر ان تكاليف التامين الصحي اتشالت .. بس برضه لسه مفيش حاجة اتغيرت في المعلن على موقع الحكومة حتى هذه اللحظة 

رابع حاجة 

الفيزا دي ما ينفعش تقدم عليها و انت ف انجلترا لو انت هناك لاي سبب .. لازم تقدم عليها من برا انجلترا مش من جوا 

خامس حاجة

مش حينفع تبدا تقدم على الفيزا الا لما الاتش ار يبعتلك شهادة ال COS .. لما تجيلك راجعها كويس و اتاكد ان بياناتك سليمة و الارقام كلها سليمة .. ثم توكل على الله و افتح اللينك ده 

https://visas-immigration.service.gov.uk/apply-visa-type/tier2

خطوات ملي الاستمارة 

1- 

حتفتح اللينك و تختار تير-2 جنرال

2-

 دخل اسم البلد مصر

3-

 حيسالك ازاي كان متاح في بلدك انك تحضر في مكان لرفع البصمات و التصوير اللى هو ال TLS اختار ان ايوة متاح 

4-

 بيدلك شوية علومات عن ال Cos .. تمام دوس apply now

5-

 حيقولك دخل ايميل و باسورد .. هو بيعملك زي اكونت عشان تقدر تسيب الاستمارة و ترجع تكملها يوم تاني .. مش لازم تبداها م الاول كل ما تخش 

6- 

حيقولك دخل اسمك

All given names 

الاسم بتاعك زي الباسبور كامل ما عدا الاسم الاخير 

Family name

 اللقب او الاسم الاخير ف الباسبور 

7-

 بيسالك اذا كان ليك اي اسماء تانية.. زي الستات عندهم مثلا بعد ما تتجوز بتحمل لقب جوزها .. قوله لا 

8- 

بيقولك معاك شهادة COS ? قوله ايوة و دخل رقمها .. حتلاقيه ف الشهادة اللى معاك

9- 

حيقولك دخل عنوانك .. دخله زي ما مكتوب ف الباسبور 

10- 

دخل رقم تلفونك

11- 

بيسالك على الجنس و الحالة الاجتماعية

12- 

بيسالك على تاريخ الميلاد و دولة و محل الميلاد

13- 

بيسالك على رقم باسبورك و تاريخ استخراجه و تاريخ انتهاء صلاحيته

14- 

بيسالك اذا كان عندك باسبور تاني قوله لا 

15-

 بيسالك على الرقم القومي .. البطاقة الشخصية

16- 

كل اللى فات ده سهل .. نيجي لاول سؤال صعب ..

 بيسالك انت تاريخ السفر بتاعك امتى و ناوي تقعد اد ايه 

ده هنا مشكلة لانك مش عارف انت حتسافر يوم كام بالظبط .. انت مستني تاخد الفيزا عشان تحجز الطيران و متعرفش الفيزا حتيجي امتى .. هنا مطلوب منك تحط يوم تقريبي .. لو انت ورقك جاهز و مش متوقع يكون في مشاكل في تجهيز حاجة .. اختار معاد بعد شهر و نص مثلا .. خلي بالك المعاد ده مهم جدا لان في ظرف شهر من المعاد ده لو مكنتش في بريطانيا الفيزا بتتلغى للاسف 

السؤال الصعب التاني انت ناوي تقعد اد ايه؟ طبعا انت ناوي تروح و ما ترجعش ..

 بس اكتب هنا المدة اللى موجودة في شهادة ال 

COS

17-

 بيسالك عن اللغة المفضلة لاستكمال الاستمارة .. قوله انجليزي .. فكك من العربي لان مصطلحاته المترجمة غريبة شوية 

18- 

بيسالك عن اذا كنت درست بالانجليزي .. الحتة دي بتاعت الناريك .. على ايامنا كانت شهادة كده مطلوبة للحصول على التير-2 .. على حسب ما سمعت هي اتلغت دلوقتي .. فغالبا انت مش حيقابلك السؤالين دول .. اللى هما انت دراستك كانت بالانجليزي و لا لا و في دولة ايه .. و الدليل على كده هو شهادة الناريك دي 

19- 

بيسالك اذا كان في ناس بتصرف عليهم .. زوجة او اولاد .. لو انت مسافر لوحدك جاوب لا 

20-

 حيطلب منك تدخل بيانات تخص الوالد و الوالدة .. اساميهم تواريخ ميلادهم

21- 

بيسالك اذا كان ليك اسرة او قرايب في انجلترا .. قوله لا

22-

 بيسالك اذا كنت مسافر من ضمن جروب مع بعض .. قوله لا 

23- 

بيسالك اذا كنت مسافر مع حد .. صديق او قريب .. قوله لا 

24-

 سؤال خازوقي جديد .. بيسالك عن المكان اللى انت حتقعد فيه في انجلترا .. لو انت اوريدي حاجز اوتيل او سكن المستشفى و كله تمام .. فالموضوع حلو .. حتديله التفصيل اللى هو عايزه .. لكن في الاغلب احنا ف وقت التقديم بتكون على الفيزا مش بنكون دفعنا في فلوس ف حجز سكن و احنا مش عارفين تاريخ السفر حيبقي يوم كام .. انا السؤال ده جاوبت عليه لا .. فحولني على صفحة فيها مربع حواري بيقولي اشرح خطتك .. حتعمل ايه ف السكن .. فكتبتله انا ناوي اقعد ف سكن المستشفى و شرحتله الوضع

25- 

بيسالك اذا كنت سافرت بريطانيا قبل كده و لا .. و اذا كنت قدمت على فيزا قبل كده و لا لا 

26-

 بيسالك اذا كنت سافرت لاوروبا او كندا او استراليا او امريكا قبل كده في اخر 10 سنين

27- 

بيسالك اذا كنت سافرت اي دولة تانية خلال اخر 10 سنين و حيطلب منك تدخل تفصيل تواريخ السفر لكل دولة 

28-

 بيسالك اذا كنت قابلت اي مشكلة مع الهجرة لبريطانيا قبل كده سواء رفض فيزا او كسر اقامة او منع دخول الخ .. قوله لا 

29-

 بيسالك اذا كان وجه ليك اي اتهامات او تمت ادانتك بجرائم في انجلترا او اي بلد تانية .. قوله لا 

30- 

بيسالك اذا كنت شاركت في انشطة ارهابية قبل كده .. قوله لا

31- 

بيسالك اذا كنت عضو في اي منظمة ارهابية قبل كده .. قوله لا 

32-

 بيسالك اذا كان ليك اي اراء متطرفة او ميول ارهابية قبل كده او شجعت او بررت العنف او الجريمة .. قوله لا 

33-

 بيسالك اذا كنت اشتغلت قبل كده ف الجيش اواجهزة امنية او مؤسسات اعلامية او قضائية او حكومية .. قوله لا .. باستثناء اللى قضوا خدمة عسكرية اجبارية .. حتعلم صح على الحتة بتاعت الجيش.. شغلك كدكتور في وزارة الصحة او الجامعة لا يعتبر شغل في جهة حكومية بالمعنى المقصود في السؤال هنا 

34-

 بيسالك على رقم رخصة الجهة اللى حتشغلك ف انجلترا .. حتلاقيه على شهادة ال COS اديهوله

35- 

بيسالك اذا كان الجهة اللى انت حتشتغل فيها "شركة مساهمة محدودة" .. قوله لا .. الان اتش اس مش كده طبعا

36- 

بيسالك اذا كان المستشفى اللى حتشغلك عاملة لك maintenance و لا لا ..حتلاقيها اخر حاجة مكتوبة في شهادة ال COS

37-

 بيسالك على اسم الوظيفة و المرتب .. دخلهم زي ما مكتوبين في شهادة ال 

COS

38- 

بيسالك اذا كنت راجعت القوانين بتاعت الفيش الجنائية المطلوبة للقادمين من الخارج .. قوله ايوة

39-
بيسالك وظيفتك دي محتاجة الفيش الجنائي؟ ..قوله ايوة

40-

 بيسالك اذا كان في اي دولة قعدت فيها اكتر من 12 شهر؟ طبعا مصر .. لو حد قعد ف دولة تانية .. ضروري يجيب فيش جنائي منها عن الفترة اللى قعدها 

41-
 بيقولك انت بتقدم كممرضة او قابلة ؟ قوله لا 

42-

 بيسالك اذا كانت الوظيفة بتاعتك من ضمن قائمة الوظايف اللى فيها عجز في بريطانيا و لا لا؟ 

حاليا كل الوظايف الطبية فيها عجز .. بس ده ممكن يختلف ف المستقبل .. فاتاكد من الرابط ده

https://www.gov.uk/guidance/immigration-rules/immigration-rules-appendix-k-shortage-occupation-list

افتح 

Table 1 - United Kingdom Shortage Occupation List

انزل تحت عند 2211

 Medical practitioners

حتلاقي مكتوب 

All jobs in this occupation code

على ايامي مكانتش كده .. كنت مكتوب وظايف العناية و الطوارئ و التخدير و الجي بي و الجراحة العام و كام تخصص تاني فقط 

حتفرق معاك في ايه اذا كانت الوظيفة فيها عجز و لا مفهاش؟ حتفرق كتير في تكلفة الفيزا اللى حتدفعها .. لو فيها عجز بيبقي سعرها اقل كتير

43- 

بيسالك على مدة شهادة ال 

COS

.. غالبا حتبقي اقل من 3 سنين

44- 

بيقولك لو عايز تضيف اي معلومات تانية .. دي لو انت حابب توضح حاجة بخصوص وضعك خايف انه يتفهم غلط في اجابتك على الاسئلة اللى فاتت .. لو مفيش حاجة و كل تمام دوس حفظ و استمرار

45-

 الصفحة اللى بعدها حتلاقيه عملك تلخيص لاجاباتك بخصوص الاستمارة كلها عشان تراجعها .. كمل عادي متابعة 

46-

 لو انت دخلت ان ال COS بتاعتك مفهاش maintenance حيطلب منك كشف حساب بنكي عشان يتاكد انك حتعرف تصرف على نفسك هناك قبل ما تقبض اول مرتب .. دخل اسم البنك.. و اختار نوع الوثيقة كشف حساب

47- 

حتلاقي عاملك تلخيص كده بالوثائق المطلوبة تجيبها : الباسبور – كشف حساب البنك – فيش جنائي الخ 

48- 

حيعملك تاني ملخص للاستمارة بتاعتك تراجع و تكمل 

49- 

بعد كده اقرار انك متاكد ان البيانات اللى دخلتها صحيحة دوس تمام

50-

 حيحولك بعد كده على موقع عشان تدفع فلوس التامين الصحي على عدد السنوات اللى في COS

51- 

حيطلب منك تاني تدخل بياناتك معلش .. ممل انا عارف .. بس بيانات سهلة مفهاش اي اشكالية

52- 

بعدين حيقولك دخل بيانات كارت الائتمان لاتمام عملية الدفع 

تكاليف التأمين الصحي .. ودي بتبقى قيمتها 400 إسترليني عن كل سنة من سنوات الـ CoS بتاعتك.. ولما تيجي تدفع أونلاين هيحسبها بالدولار برضه .. سمعنا كلام انها احتمال تتلغي و الله اعلم 

53-

 حيقولك تمت عملية الدفع و يديك رقم كودي و يبعتلك ايميل انك دفعت التامين الصحي و بعدين يرجعك تاني على موقع الاستمارة

54- 

حيقولك اختار مكتب البريد الى عايز تستلم منه كارت الاقامة بتاعك ال BRP

لما تستلم الباسبور و عليه الفيزا مقبولة ان شاء الله حتلاقي الفيزا دي مدتها من اول يوم اللى انت قلت انك متوقع تسافر فيه و لمدة شهر .. المفروض في خلال الفترة دي انت تكون دخلت انجلترا و روحت مكتب بريد تستلم منه كارنيه الاقامة اللى حتلاقي صلاحيته على قد مدة شهادة ال COS و ده بعد كده اللى حتمشي بيه و تخلص كل ورقك و تعدي بيه في المطارات زي الفيزا و كل حاجة 

المهم انت حتشوف مكان المستشفى او السكن بتاعك و شوف اقرب مكتب بريد منه و دخل بياناته 

55-

 بعدين حيقولك ادفع بقي يا سيدي تمن الاستمارة نفسها ..ده غير التامين الصحي .. حتدخل بيانات كارت الائتمان لاتمام عملية الدفع تاني .. دي تقريبا 464 استرليني .. بيحولك قيمتهم بالدولار برضه

56- 

بعد كده حيحولك على الخطوة الاخيرة و هي تاكيد اتمام عملية الدفع و لستة الوثائق المطلوب تقدمها مع الباسبور و حيطلب منك تعمل اكونت على موقع شركة ال TLS و تحجز معاد اونلاين عشان تروح تسلم الباسبور و الورق المطلوب و ياخدوا بصماتك و يصوروك .. في حتة مكتوبة كده بتقلق شوية اختبار السل .. 

ملكش دعوة بيها .. مصر مش من ضمن الدول المطلوب منها تجيبها

بالتوفيق للجميع